Kastriot Hasko, biznesmeni që u prezantua si pronari i tokës së sherrit në Palasë mes Luan Muçës dhe Vasil Bedinajt është arrestuar nga prokuroria e Fierit.
Hasko është arrestuar për dyshimin e falsifikimit të pronësisë të një sipërfaqe të madhe toke në zonën e Semanit në Fier. Bashkë me të në pranga ka rënë dhe Ertis Shehu, ish drejtori i Kadastrës së Fierit.
Pas përplasjes me armë mes biznesmenëve Muça dhe Bedinaj, zoti Hasko doli në media duke u prezantuar si pronar i parcelës për të cilën ndodhi konflikti.
Ai tha se tokën e kishte trashëguar nga gjyshi dhe se për të kishte lidhur kontratë zhvillimi me biznesmenin Bedinaj.
Shehu dhe Hasko kanë qenë prej muajsh nën hetim nga Prokuroria e Fierit, ndërsa urdhër-arrestet janë ekzekutuar mbrëmjen e kësaj të mërkure në Tiranë.
Burime bëjnë me dije se rasti falsifikimit të dokumentave të pronësisë në Seman është zbuluar në fund të vitit 2024, vetëm 2 muaj pasi drejtoresha e Përgjithshme e Kadastrës, Lorena Goxhobelli, kishte marrë detyrën, konstatuar nga një kontroll administrativ./ Kapitali.al
