Dy akuza penale janë në qendër të masës “arrest në shtëpi” të vendosur nga GJKKO ndaj drejtoreshës së SHISH, Vlora Hyseni.
Hyseni dyshohet për veprat penale “përkrahja e autorit të krimit” dhe “nxjerrja e sekretit shtetëror”, në kuadër të hetimeve të SPAK për dosjen e AKSHI-t.
Krahas masës së sigurisë, GJKKO ka vendosur edhe pezullimin e saj nga detyra si drejtuese e Shërbimit Informativ Shtetëror.
Kontrollet e SPAK në kuadër të këtij hetimi janë shtrirë edhe në banesën e Hysenit, por ajo nuk është gjetur aty. Sipas raportimeve të News24, në momentin e operacionit drejtoresha e SHISH ndodhej në Baku të Azerbajxhanit, ku merrte pjesë në një konferencë me drejtues të shërbimeve informative nga vende të ndryshme të botës.
Hetuesit kanë ushtruar kontrolle edhe në banesën e ish-drejtorit të Përgjithshëm të Policisë së Shtetit, Ilir Proda, ndërsa operacioni vijon dhe pritet të zbardhen edhe persona të tjerë që janë pjesë e hetimit.
