SPAK ka ndërmarrë një aksion sot ndaj disa personave me poste të larta shtetërore, përfshirë ish-Drejtorin e Policisë Ilir Proda dhe drejtoreshën e SHISH Vlora Hyseni.
Hyseni është pezulluar nga detyra dhe ndaj saj është caktuar masa e sigurisë “arrest në shtëpi”, pasi dyshohet për veprat penale “përkrahja e autorit të krimit” dhe “nxjerrja e sekretit shtetëror”, në kuadër të hetimeve të SPAK për dosjen e AKSHI-t.
Si nisi karriera e Hysenit
Karriera e Vlora Hysenit në strukturat e inteligjencës nisi në Prishtinë, përpara se ajo të shfaqej në një prej posteve më të rëndësishme të sigurisë kombëtare në Shqipëri.
Sipas të dhënave zyrtare të publikuara nga Shërbimi Informativ i Shtetit, Hyseni e ka nisur karrierën profesionale në vitin 2008 dhe në vitin 2010 iu bashkua Agjencisë së Kosovës për Inteligjencë. Në shkurt 2019 ajo u emërua zëvendësdrejtore e AKI-së, ndërsa gjatë periudhës kur drejtor i institucionit ishte larguar nga detyra, Hyseni shërbeu edhe si ushtruese detyre.
Por karriera e saj në Kosovë mori një kthesë të fortë në vitin 2021.
Më 30 qershor 2021, Hyseni u largua nga funksionet që mbante në strukturat e inteligjencës së Kosovës.
Me një vendim të përbashkët, Presidentja e Kosovës Vjosa Osmani dhe Kryeministri Albin Kurti njoftuan shkarkimin e saj të menjëhershëm nga të gjitha funksionet. Arsyetimi zyrtar i Prishtinës fliste për “humbje të besimit” dhe mospërputhje me linjën e bashkëpunimit institucional.
Rrethet mediatike dhe politike pranë opozitës dhe qeverisë zhvilluan debate të ashpra lidhur me dyshimet për rrjedhje informacioni, përplasje kompetencash dhe pretendime për lidhje paralele me faktorë të jashtëm.
Kurti e ‘flaku’, Rama i jep postin më të rëndësishëm
Vendimi u bë në një periudhë të ndjeshme për institucionet e sigurisë në Prishtinë dhe u shoqërua me polemika largimi i saj.
Largimi nga Prishtina nuk shënoi fundin e karrierës së Hysenit në sektorin e sigurisë. Përkundrazi, ajo u shfaq më pas në Tiranë, në një tjetër nivel të strukturave shtetërore të inteligjencës.
Hyseni u zhvendos në Tiranë, ku u afrua nga Kryeministri Edi Rama si këshilltare e tij e drejtpërdrejtë për çështjet e sigurisë kombëtare dhe inteligjencës.
Më 15 mars 2023, Rama njoftoi publikisht se i kishte propozuar Presidentit Bajram Begaj emërimin e Vlora Hysenit në krye të Shërbimit Informativ të Shtetit (SHISH), pas largimit të Helidon Bendos.
Arritja e Vlora Hysenit në krye të SHISH-it shkaktoi përplasje të mëdha në Tiranë. Opozita shqiptare, e udhëhequr nga Partia Demokratike, e sulmoi vendimin duke e konsideruar një cenoje të sigurisë kombëtare dhe një sfidë direkte ndaj shtetit të Kosovës.
