Policia greke ka zbardhur ngjarjen e rëndë të ndodhur në janar të vitit 2025 në Selanik, ku 32-vjeçari Danjel Dushku, vëllai i Fabio Dushkut, dyshohet se ishte objektiv i një atentati me armë zjarri.
Në kuadër të hetimeve, oficerët e Nëndrejtorisë Kundër Krimit të Organizuar të Greqisë Veriore kanë arrestuar tre shtetas shqiptarë, të dyshuar për përfshirje në tentativën e vrasjes.
Të arrestuarit janë:
-
Robert Elezaj, 33 vjeç;
-
Sergo Elezaj, 31 vjeç;
-
Rueldi Dragjoshi, 26 vjeç.
Në të njëjtën kohë, Danjel Dushku, 32 vjeç, është shpallur në kërkim nga autoritetet greke.
Ngjarja ka ndodhur mbrëmjen e 8 janarit 2025, në një zonë të Selanikut. Sipas policisë greke, tre të dyshuarit iu afruan Dushkut dhe dyshohet se hapën zjarr në drejtim të tij.
Sipas hetimeve, Robert Elezaj, duke përdorur një pistoletë, ka qëlluar drejt Dushkut, por nuk ka arritur ta plagosë. Nga të shtënat është plagosur një person që ndodhej pranë tij, ndërsa plumbat kanë shkaktuar dëme edhe në një dyqan në zonë.
Edhe Rueldi Dragjoshi dyshohet se ka qëlluar me armë në drejtim të Dushkut, pa e prekur atë.
Ndërkohë, Sergo Elezaj dyshohet se i ka drejtuar armën Dushkut. Autoritetet greke thonë se nuk kanë mundur të përcaktojnë nëse ai ka qëlluar me armë, por dyshohet se ka ndihmuar dy personat e tjerë para dhe gjatë ngjarjes.
Sipas policisë, Sergo Elezaj ka transportuar dy të dyshuarit e tjerë drejt vendit të ngjarjes me një automjet me qira dhe ka qëndruar me ta deri në momentin e largimit.
Nga ana tjetër, hetimet kanë zbuluar se edhe Danjel Dushku ka përdorur armë zjarri gjatë përplasjes. Sipas autoriteteve greke, ai ka qëlluar në drejtim të personave të dyshuar, por të shtënat e tij nuk kanë shkaktuar të plagosur. Plumbat kanë dëmtuar automjetin me të cilin kishin mbërritur të dyshuarit, si dhe një tjetër makinë të parkuar.
Operacioni për arrestimin e tre shqiptarëve u zhvillua në orët e mëngjesit të së mërkurës, pas urdhër-arresteve të lëshuara nga autoritetet greke.
Policia greke vijon hetimet për zbardhjen e plotë të rrethanave të atentatit dhe përcaktimin e përgjegjësisë së secilit prej personave të përfshirë në përplasjen me armë.
