Tre shtetas shqiptarë janë arrestuar dhe një tjetër është proceduar penalisht në Itali, pasi u kapën duke vjedhur kabllo bakri në një stacion treni në zonën e Via Monterumici, në Treviso.
Sipas mediave italiane, ngjarja ka ndodhur gjatë natës, pasi policia kishte marrë sinjalizime për lëvizje të dyshimta në zonë.
Patrullat ndërhynë menjëherë dhe konstatuan disa persona që po tentonin të largoheshin nga vendi i ngjarjes. Pas një ndjekjeje të shkurtër, tre prej tyre u kapën dhe u shoqëruan në komisariat.
Të arrestuarit janë shtetas shqiptarë, pa vendbanim të përhershëm në Itali. Gjatë kontrollit, policia gjeti dhe sekuestroi 52 bobina kabllo elektrike prej alumini dhe bakri, me diametër rreth 2 centimetra, të cilat ishin vjedhur nga një depo pranë linjës hekurudhore. Materialet u gjetën rreth 150 metra larg vendit të vjedhjes.
Gjithashtu, në zonë u sekuestruan edhe mjete të përdorura për thyerjen e gardhit metalik dhe hyrjen në ambientet e depos.
