Prokuroria pranë Gjykatës së Shkallës së Parë të Juridiksionit të Përgjithshëm, Tiranë, ka përfunduar hetimet dhe ka dërguar për gjykim shtatë persona, pas humbjes së jetës së 3-vjeçarit B.S., i cili ndërroi jetë pas një ndërhyrjeje dentare të kryer në një klinikë private në kryeqytet.
Sipas njoftimit zyrtar, procedimi penal nr. 6477 i vitit 2023 ka çuar në akuzimin e mjekëve R.Xh. dhe M.G. për veprat penale “Vrasje nga pakujdesia” dhe “Mashtrim”, të kryera në bashkëpunim. Ndërkohë, shtetasja I.Xh. është dërguar në gjyq për “Vrasje nga pakujdesia”, “Mashtrim” në bashkëpunim dhe “Ushtrim të aktivitetit të paligjshëm”.
Gjithashtu, shtetasit E.S. dhe E.A., ekspertë të Institutit të Mjekësisë Ligjore, akuzohen për “Shpërdorim detyre”, ndërsa mjekët D.A. dhe V.H. janë marrë të pandehur për veprën penale “Neglizhenca në trajtimin mjekësor”.
Ngjarja e rëndë ka ndodhur më 28 shtator 2023, kur i mituri iu nënshtrua një ndërhyrjeje dentare në 14 dhëmbë në klinikën “Splendent”, e drejtuar nga mjekët R.Xh. dhe I.Xh. Pas ndërhyrjes, fëmija u dërgua në shtëpi, por brenda pak orësh gjendja e tij shëndetësore u përkeqësua ndjeshëm. Ai u transportua në gjendje kome dhe me insuficiencë respiratore akute në Spitalin e Pediatrisë pranë QSUT “Nënë Tereza”, ku më 1 tetor 2023 ndërroi jetë.
Sipas aktit të riekspertimit dhe ekspertimit mjekoligjor shtesë, të kryer nga një grup ekspertësh italianë, shkaku kryesor i vdekjes së të miturit ka qenë shoku septik i rëndë, i cili solli insuficiencë progresive shumëorganore. Ekspertët kanë konstatuar shkelje të rënda të protokolleve mjekësore ndërkombëtare gjatë ndërhyrjes dentare dhe procedurës së anestezisë, shkelje që kanë lidhje të drejtpërdrejtë shkakësore me vdekjen e fëmijës.
Sipas ekspertizës, i mituri iu nënshtrua një procedure kirurgjikale të pajustifikuar për moshën e tij, pa kontrolle të plota paraprake, pa një diagnozë të saktë dhe pa kryer testet e detyrueshme. Ndërhyrja u krye për rreth pesë orë nën anestezi të përgjithshme, duke trajtuar njëkohësisht disa dhëmbë, përfshirë edhe dhëmbë me infeksion të pulpës, çka rriti ndjeshëm rrezikun për komplikacione serioze.
Ekspertët kanë vlerësuar gjithashtu si të papërshtatshme nxjerrjen e fëmijës nga klinika menjëherë pas ndërhyrjes, pa monitorim të zgjatur, duke mos marrë parasysh rreziqet e anestezisë dhe gjendjen shëndetësore të të miturit.
Nga hetimi ka rezultuar se stomatologët I.Xh. dhe M.G. kanë mashtruar prindërit, duke u marrë pagesë për mbushjen e 14 dhëmbëve, ndërkohë që autopsia tregoi se 6 prej tyre ishin vetëm hapur, por jo të mbushur. Për këtë arsye, ndaj tyre është ngritur edhe akuza për “Mashtrim”.
Po ashtu, është provuar se pas ngjarjes, stomatologia I.Xh. ka vijuar ushtrimin e aktivitetit në mënyrë të paligjshme, pa rinovuar licencën pranë Urdhrit të Stomatologut.
Hetimet kanë zbuluar edhe shkelje të rënda të protokolleve mjekoligjore gjatë autopsisë dhe ekspertizës fillestare, të kryera nga ekspertë të Institutit të Mjekësisë Ligjore, si dhe mangësi në trajtimin e fëmijës nga mjekët e pediatrisë në momentin e paraqitjes në spital.
Megjithatë, sipas aktit të riekspertimit, vdekja e të miturit nuk ka ardhur si pasojë e mosveprimeve të mjekëve të pediatrisë, por si rezultat i drejtpërdrejtë i veprimeve dhe mosveprimeve të mjekëve që kryen ndërhyrjen dentare.
