Ministri i Punëve të Brendshme, Ervin Demo, ka kërkuar shtimin e vëmendjes dhe masave nga Policia Rrugore për lehtësimin e trafikut në Tiranë, gjatë një inspektimi të zhvilluar sot në zonën e “21 Dhjetorit”, një prej nyjeve më problematike të qarkullimit në kryeqytet.
Demo është shprehur se dëmtimi i infrastrukturës rrugore, sinjalistikës dhe semaforëve gjatë javëve të fundit ka sjellë vështirësi të shtuara në lëvizjen e automjeteve, duke ndikuar drejtpërdrejt në përditshmërinë e qytetarëve.
“Ne kemi qenë dëshmitarë të asaj çfarë ka ndodhur në Tiranë gjatë javëve të fundit, dhe patjetër që dëmtimi i infrastrukturës, sinjalistikës në tërësi, i infrastrukturës urbane ka sjellë vështirësi në qarkullim. Kuptohet që dëmtimi i semaforëve janë elementët e parë që kanë sjellë, e këtu jemi pikërisht te “21-shi”, i cili është një nga nyjet më problematike që kemi. Masat janë shtuar nga Policia e Qarkullimit Rrugor, por ne duhet të garantojmë që qytetarët nuk duhet kurrsesi të humbasin më shumë kohë se ç’është e domosdoshme për sa i përket vajtjes në punë, shkolla dhe aq më tepër për të garantuar, në të njëjtën kohë, edhe sigurinë e qarkullimit rrugor në tërësi”, u shpreh ministri Demo.
Demo bëri të ditur se në fund të kësaj jave do të zhvillohet një vlerësim i masave të ndërmarra, për të parë konkretisht efektin e tyre në përmirësimin e qarkullimit dhe në reduktimin e kohës që qytetarët humbasin në trafik.
“Unë besoj që tashmë roli i Policisë Rrugore është akoma dhe më i rëndësishëm. Këto masa të shtuara janë të domosdoshme që të vazhdojnë. Duhet me patjetër të bëjmë një vlerësim në fund të kësaj jave, për sa i përket masave dhe efektit që ato kanë pasur, përsa i përket lëvizjes dhe kohës që qytetarët humbasin në trafik. Por unë jam i bindur që Policia e Shtetit do të jetë akoma dhe më shumë e fokusuar për të garantuar jo vetëm sigurinë publike, por edhe cilësinë e jetesës në qytet. Policia Rrugore duhet të ketë patjetër një fokus të veçantë edhe për sa i përket bllokimit të qarkullimit për shkak të parkimeve dyshe dhe çdo veprim tjetër që bie në kundërshtim me Kodin Rrugor, për të garantuar që çdo qytetar të lëvizë i lirë dhe, aq më tepër, të lëvizë në kohë”, theksoi Demo.
