Administrata gjyqësore ka nisur bojkotin e parë për shkak të ngërçit me pagat në sistemin e drejtësisë.
Punonjësit dhe sekretarët e Dhomës Civile në Gjykatën e Tiranës kanë ndërprerë shërbimet, duke kërkuar sqarime për vonesën e pagave të muajit gusht dhe për fatin e pagave të tyre në vijim.
Administrata ka njoftuar drejtuesin e gjykatës për situatën. Punonjësve u është bërë me dije se një qëndrim pritet pas mbledhjes së kryetarëve të gjykatave, e cila është parashikuar të zhvillohet sot në orën 15:00 në Gjykatën e Lartë.
Ndërkohë, situata pritet të diskutohet edhe nga drejtuesit e prokurorive. Prokurori i Përgjithshëm Olsian Çela ka thirrur në takim drejtuesit e prokurorive të rretheve, Shoqatën e Prokurorëve dhe anëtarët e KLP-së.
