Kryetari i Grupit Parlamentar të Partisë Demokratike, Gazment Bardhi, ka kritikuar Presidentin Bajram Begaj pas njoftimit të Presidencës për konsultimet mbi datën e zgjedhjeve të ardhshme vendore.
Bardhi e ka cilësuar këtë proces si një “teatër politik”, duke vënë në pikëpyetje seriozitetin e ftesës së kreut të shtetit drejtuar palëve për konsultim.
Sipas përfaqësuesit të PD-së, Presidenti nuk po ushtron rolin e tij kushtetues në mënyrë të pavarur, por po vepron në interes të kryeministrit Edi Rama.
Bardhi ka theksuar se vendi ka nevojë për garanci konkrete për zhvillimin e zgjedhjeve të lira dhe të ndershme. Ai ka kërkuar që shqetësimet e qytetarëve dhe kërkesat e tyre të trajtohen si një emergjencë demokratike, ndërsa ka kritikuar qëndrimin që, sipas tij, Presidenti po mban ndaj protestave.
Në përfundim, Bardhi nënvizon se kreu i shtetit duhet të përfaqësojë Kushtetutën, demokracinë dhe interesat e qytetarëve, e jo të shërbejë si mbështetje për qeverinë.
REAGIM I KRYETARIT TË GRUPIT PARLAMENTAR TË PD, GAZMENT BARDHI
Sapo jam njohur me shkresën e Institucionit të Presidentit për thirrjen e konsultimeve lidhur me datën që Edi Rama ka paracaktuar për zgjedhjet e ardhshme vendore. E përbuz me neveri këtë teatër politik.
Ftesa e Bajram Begajt është tërësisht e shpërfillshme dhe nuk meriton as koment. Për fat të keq, Shqipëria nuk ka një President të Republikës që përmbush rolin e tij kushtetues, por një ministër pa portofol në shërbim të Edi Ramës.
Shqiptarët janë në shesh për të kërkuar, ndër të tjera, garanci për zgjedhje të lira dhe të ndershme. Nëse Shqipëria do të kishte një President që e ushtron realisht funksionin e tij kushtetues, ai do ta trajtonte këtë çështje si një emergjencë demokratike dhe do t’u përgjigjej me seriozitet shqetësimeve që prej muajsh po i nxjerrin qytetarët në shesh.
Në vend që të heshtë përballë këtyre shqetësimeve, Presidenti duhet të ishte zëri i Kushtetutës, i demokracisë dhe i qytetarëve. Por, në vend që të përmbushë këtë detyrim, ai zgjedh të mbetet në rolin e një spektatori, duke i shërbyer pushtetit në vend që të mbrojë institucionin që përfaqëson.
