Policia e Tiranës ka vënë në pranga një 43-vjeçarin Hashim (Abdyl) Basha, banues në Budull. Ai është dënuar me 5 vjet e 6 muaj burgim, për rrëmbim personi dhe vjedhje me dhunë, nga Gjykata për të Mitur në Torino. 43-vjeçarit i kanë mbetur edhe 2 vjet e 6 muaj burgim.
“Shërbimet e Seksionit për Hetimin e Krimeve Ndaj Personit, në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar dhe në informacionet e siguruara në rrugë operative, për vendndodhjen e një shtetasi të shpallur në kërkim, organizuan dhe finalizuan operacionin policor të koduar “Monday”.
Ky shtetas është dënuar 5 vjet e 6 muaj, burgim, për veprat penale “Rrëmbimi i personit dhe “Vjedhja me dhunë”, dhe nga përllogaritja e dënimit sipas njohjes dhe ekzekutimit në shtetin shqiptar, të vendimit penal të huaj të Gjykatës për të Mitur në Torino, i kanë mbetur dhe 2 vjet e 6 muaj burgim.”- njofton policia.
Materialet i kaluan Prokurorisë, për veprime të mëtejshme.
