Gjykata e Fierit ka vendosur “Arrest në burg” për Bledar Bakajn, dajën e deputetes së Partisë Socialiste, Zegjine Çaushi, i cili u ndalua tre ditë më parë pas një konflikti në fshatin Suk të Roskovecit.
Bakaj dyshohet se ka dhunuar 67-vjeçarin Enver Gremaj, duke e goditur me një mjet bujqësor në këmbë. Ngjarja është regjistruar rreth orës 22:30 të së dielës, pasi i dyshuari është paraqitur në banesën e 67-vjeçarit.
Konflikti dhe urdhri i mbrojtjes
Sipas hetimeve, konflikti lidhet me ish-bashkëjetuesen e Bakajt, për të cilën gjykata kishte vendosur më herët një urdhër mbrojtjeje.
I dyshuari akuzohet se ka shkelur vendimin e gjykatës duke shkuar në banesën ku ndodhej ish-bashkëjetuesja dhe më pas situata ka përshkallëzuar në konflikt.
Për ngjarjen, ndaj Bakajt rëndojnë akuzat për “Plagosje të rëndë me dashje” dhe “Veprime në kundërshtim me vendimin e gjykatës”.
Çfarë ka deklaruar Bakaj
Pas ndalimit, Bakaj ka mohuar akuzat për abuzim seksual ndaj 34-vjeçares Merita Gremaj. Në deklarimet e tij në komisariat, ai është shprehur se nuk e ka abuzuar gruan dhe se do të japë shpjegimet e tij përpara gjykatës.
Ndërkohë, Merita Gremaj ka bërë akuza të rënda ndaj tij në një intervistë televizive, ku ka deklaruar se gjatë periudhës së bashkëjetesës ka përjetuar dhunë fizike dhe psikologjike.
Ajo ka pretenduar gjithashtu se është marrë me forcë dhe është abuzuar seksualisht nga Bakaj, duke përshkruar edhe kërcënime që, sipas saj, i janë bërë në vazhdimësi.
“Mu shfaq një si doktor, me përparëse. Ai doli nga prapa, me merr prej gurmazi më fut në makinë dhe merr ne telefon babain. I thotë babait që kam marrë ambulancën, por nuk ishte ambulancë. Më ka çuar në Levan, më ka futur nëpër ferra dhe më ka përdhunuar. Më ka marrë zvarrë, më ka çuar te e motra. Më ka çuar në varreza më thoshte, këtu është vendi jot”, ka treguar ajo.
Këto janë pretendime të 34-vjeçares, ndërsa hetimi dhe procesi gjyqësor do të përcaktojnë përgjegjësitë penale.
Reagimi i deputetes Çaushi
Pas publikimit të akuzave, deputetja socialiste Zegjine Çaushi ka reaguar duke deklaruar se e ka mësuar ngjarjen përmes mediave.
Ajo ka dënuar çdo formë dhune dhe ka kërkuar që çështja të trajtohet nga institucionet përgjegjëse.
Çaushi ka treguar se kishte zhvilluar më herët një takim me dajën e saj dhe ish-bashkëjetuesen e tij, ku, sipas saj, u kishte kërkuar që të shmangnin përshkallëzimin e situatës dhe problemet e mëtejshme.
Ndërsa tashmë çështja ndodhet në duart e drejtësisë, Bakaj do të vijojë përballjen me akuzat nën masën e sigurisë “Arrest në burg”.
