Protesta e 117-të u shoqërua me momente tensioni mes qytetarëve dhe forcave të policisë, gjatë kohës që në Kuvend zhvillohej seanca plenare.
Protestuesit, të cilët kishin dalë në rrugë për të vijuar protestën, nuk u lejuan t’i afroheshin godinës së Parlamentit për shkak të kordonit të policisë.
Në përpjekje për të mbajtur turmën larg zonës së Kuvendit, efektivët e Forcave “Shqiponja” i zhvendosën protestuesit nga zona e Xhamisë së Namazgjasë në drejtim të Kishës Katolike.
Në mesin e tensioneve, një qytetar humbi ndjenjat dhe u rrëzua në tokë. Situata shkaktoi reagimin e menjëhershëm të personave që ndodheshin pranë tij, të cilët u mblodhën rreth qytetarit dhe kërkuan ndërhyrjen e ambulancës.
Pas pak minutash, ambulanca mbërriti në vendngjarje dhe qytetarit iu dha ndihma e nevojshme mjekësore.
Protesta vijoi mes tensioneve, ndërsa forcat e policisë qëndruan në vijën e parë për të penguar afrimin e protestuesve drejt Parlamentit.
