Deputetja e pavarur Marjana Koçeku ka reaguar pas vizitës në Kosovë të një kandidateje nga lista studentore e Serbisë, e cila deklaroi se Kosova është pjesë e Serbisë.
Përmes një reagimi në rrjetin social X, Koçeku thekson se nëse Serbia synon të demokratizohet, duhet të heqë dorë përfundimisht nga pretendimet territoriale ndaj Kosovës dhe nga ambiciet nacionaliste kundër saj.
Sipas Koçekut, edhe lista studentore serbe duhet të tregojë pjekuri politike, të ndryshojë narrativën dhe të dëshmojë përparim të vërtetë në qëndrimin ndaj Kosovës.
“Një kandidate nga lista studentore e Serbisë viziton Kosovën dhe deklaron se ajo është pjesë e Serbisë.
Nëse Serbia do të demokratizohet, ajo duhet të heqë dorë një herë e mirë nga pretendimet e saj ndaj Kosovës dhe nga ambiciet e saj shoviniste kundër saj.
Lista studentore duhet të dëshmojë pjekuri politike, një ndryshim të narrativës dhe përparim të vërtetë. Hapi i parë është njohja e pavarësisë së Kosovës”, shkruan Koçeku reagimin e saj.
