Alket Rizai, shqiptari i dënuar për vrasje dhe një prej emrave më të njohur të botës së krimit në Greqi për shkak të dy arratisjeve spektakolare nga burgu, është rikthyer në vëmendjen e autoriteteve greke.
Sipas raportimeve të mediave greke, që prej vitit 2021 Rizai ka përfituar nga 16 leje daljeje nga burgu, pavarësisht historikut të tij dhe faktit se në të kaluarën ishte arratisur dy herë nga burgu i Korydallos, në të dyja rastet me helikopter.
Lejet e daljes nuk jepen automatikisht, por pas një procedure ku shqyrtohen sjellja e të dënuarit, qëndrimi i tij gjatë vuajtjes së dënimit dhe mënyra se si ka respektuar lejet e mëparshme. Kërkesa shqyrtohet nga këshilli i burgut, ndërsa vendimi përfundimtar merret nga prokurori.
Pikërisht numri i lartë i lejeve të dhëna për Rizain ka ngritur pikëpyetje në Greqi, veçanërisht pas ngjarjes së fundit. Gjatë lejes së tij të fundit, shqiptari dyshohet se u përfshi në një incident të armatosur jashtë një lokali në zonën e Saronidës. Pas ngjarjes, autoritetet kanë nisur kërkimet për lokalizimin e tij, ndërsa vendndodhja e Rizait mbetet e panjohur.
Alket Rizai është përmendur gjithashtu në lidhje me një tjetër ngjarje të rëndë të ndodhur brenda burgjeve greke.
Më 18 shkurt 2026, Antonis Papadatos, 43 vjeç, u gjet i vrarë në zyrën e tij në burgun e Domokosit. Papadatos po vuante dënimin për vrasjen e Dimis Korfiatis në Zakynthos.
Sipas hetimeve, autoritetet dyshojnë se pas ekzekutimit qëndron një i burgosur bullgar, i cili akuzohet për vrasjen e biznesmenit Yannis Makris në vitin 2018 në Voula.
