Gjykata e Lezhës ka caktuar masën e sigurisë “Arrest me burg” për 38-vjeçarin Simon Gjoka, i cili u arrestua nën akuzat për vjedhje dhe dyshimit të kryerjes së marrëdhënieve seksuale me të mitur.
Masa e kërkuar nga prokurorja Denisa Perdja është pranuar nga gjykatësja Englantina Biba, e cila e ka vlerësuar të ligjshëm arrestimin e 38-vjeçarit.
Gjoka u arrestua pas dyshimeve për disa vjedhje bagëtish, por pas vendosjes në përgjim, u zbulua se komunikonte me një 13-vjeçare me biseda me kontekst seksual. Nëna e të miturës kishte miqësi me Simon Gjokën.
Menjëherë është bërë shoqërimi dhe marrja në pyetje në praninë e psikologut dhe nënës së saj, të 13-vjeçares që ka dëshmuar se lidhja me 38-vjeçarin kishte filluar prej më shumë se 1 viti dhe se kishin kryer edhe marrëdhënie seksuale.
Në telefonin e të miturës janë gjetur videot intime dhe foto, por vajza ka pranuar gjithashtu se 38-vjeçari e kishte prezantuar edhe me persona të tjerë, ndërsa është ngritur dyshimi se mund të jetë shfrytëzuar prej tij për prostitucion.
Gjatë seancës së sotme gjyqësore 38-vjeçari ka mohuar se ka kryer marrëdhënie me të miturën, duke pretenduar se fotot dhe video që janë gjetur në telefon nuk janë të asaj natyre.
Gjykata i ka kërkuar prokurorisë vijimin e hetimeve në lidhje me dyshimet për marrëdhënie seksuale me të miturën.
Pritet akt ekspertimi i mjekut ligjor dhe marrja sërish në pyetje e të miturës për të përcaktuar nëse ajo është shfrytëzuar për prostitucion. E mitura shiste qirinj në Kishën e Shna Ndout në Laç.
