Kryedemokrati Sali Berisha ka reaguar ashpër ndaj aksionit të shembjes së disa ndërtimeve në Theth, duke e cilësuar si një nga krimet më të rënda shtetërore në historinë e Shqipërisë.
Berisha akuzon kryeministrin Edi Rama për urrejtje ndaj qytetarëve dhe përdorim të ushtrisë në kundërshtim me Kushtetutën.
“Thethi është kthyer në një shesh shkatërrimi, në mënyrën më barbare që nuk e ka bërë asnjë pushtues,” u shpreh Berisha. Sipas tij, ndërtesat që janë shembur nuk janë në zonën e mbrojtur të parkut kombëtar, por në zonën urbane, ku sipas ligjit lejohet ndërtimi.
Duke folur nga selai blu, ai theksoi se të gjitha ndërtimet janë bërë në tokë private, pa cënuar pronën publike apo të të tjerëve, dhe janë respektuar kriteret e përcaktuara për këtë zonë turistike si ndërtim me dru apo gur.
BERISHA: Thethi përbën në historinë e Shqipërisë një nga krimet shtetërore më të rënda, më të shëmtuara.
Dëshmi e shpërthimit të urrejtjes së një njeriu që ka urrejtjen njerëzore si shtyllë kryesore të moralit të tij të kalbur.
Edi Rama e ka shndërruar Thethin në një shesh shkatërrimi, në të cilin ky fshat, kjo zonë nuk është shndërruar kurrë nga asnjë pushtues, qoftë edhe më barbarët.
Sot që flasim, në Theth janë hordhitë e ushtrisë, të cilat në kundërshtim me çdo ligj, në kundërshtim flagrant me Kushtetutën, janë shpalosur me urdhër të armikut të egër të Thethit dhe kryejnë detyrat që i ka ngarkuar Rama.
Pra, është i pabesë, i pamoral, i pafjalë.
Asnjë ndërtesë nuk është në zonën e mbrojtur, të gjitha ndërtimet janë në zonat urbane.
Po, Thethi është park kombëtar, por Thethi ka një zonë urbane ku ndërtohet.
Shiheni atë zonjën që ka në krah, shend e verë.
Asnjë ndërtim në tokë publike, as edhe në tokën e tjetrit, të gjitha në tokën e vet.
Ndërtime druri, siç përcakton rregullorja për Thethin, druri ose guri.
