Në kuadër të hetimeve për dosjen e AKSHI-t, SPAK ka vijuar aksionin me masa sigurie dhe kontrolle në Tiranë e Durrës. Mes personave të arrestuar është edhe biznesmeni durrsak Embro Sulejmani, i njohur si administratori i agroturizmit “Kodra e Kuajve”. Masa “arrest në burg” ndaj tij është kërkuar nga SPAK dhe është miratuar nga GJKKO, ndërsa Sulejmani është vënë në pranga këtë të martë.
Sulejmani, punonte si administrator në një lokal në bllokun qeveritar dhe dyshohet se ka fshirë kamerat e sigurisë pas arrestimit të Agasit për të fshehur gjurmët që ai frekuentonte këto ambiente
Paralelisht, agjentët e BKH-së kanë zhvilluar kontrolle në disa banesa në Tiranë dhe në zonën e Shkozetit në Durrës. Kontrollet janë kryer edhe në banesat e ish-drejtorit të Policisë së Shtetit, Ilir Proda, dhe drejtoreshës së SHISH, Vlora Hyseni. Sipas të dhënave të bëra publike, dy prokurorët e çështjes, Bledar Maksuti dhe Altin Dumani, kanë kërkuar një sërë masash sigurie për zyrtarë, ish-zyrtarë dhe persona të lidhur me hetimin.
Mes masave të miratuara është edhe “arresti në shtëpi” dhe pezullimi nga detyra për Vlora Hysenin, ndërsa në pranga ka përfunduar edhe Fatjon Kalluci, shef i Laboratorit Shkencor të Policisë së Shtetit. Për të është caktuar masa “arrest në burg”, e cila është ekzekutuar mëngjesin e sotëm. Hetimet vijojnë për të zbardhur lidhjet dhe rolin e personave të përfshirë në dosjen që SPAK po heton./ Marrë nga “JOQ Albania”
