Një ngjarje tragjike ka tronditur zonën e Belshit, ku elektricisti i OSHEE-së, Klajd Zekthi, ka humbur jetën teksa ndodhej në terren pas stuhisë që përfshiu zonën.
Sipas të dhënave paraprake, pas motit të keq dhe dëmtimeve të shkaktuara në rrjetin elektrik, ekipet e OSHEE-së kanë dalë në terren për të ndërhyrë dhe rikthyer furnizimin me energji elektrike. Mes punonjësve që ndodheshin në terren ishte edhe elektricisti Klajd Zekthi, i cili fatkeqësisht nuk është kthyer më në shtëpi.InfoNews.al mëson se një prej pikave që kërkon hetim të plotë lidhet me kushtet në të cilat punonjësit e OSHEE-së dërgohen për të ndërhyrë në terren, veçanërisht në situata të motit ekstrem.
Burime paraprake ngrenë pikëpyetje mbi mungesën e pajisjeve dhe mjeteve të nevojshme të sigurisë në punë, të cilat duhet të garantojnë mbrojtjen e elektricistëve gjatë ndërhyrjeve në rrjet.
Në raste të tilla, kur ekipet punojnë nën presionin e rikthimit të energjisë pas stuhive, rreziku për punonjësit është veçanërisht i lartë. Për këtë arsye, është e domosdoshme të sqarohet nëse punonjësit kanë pasur në dispozicion të gjitha pajisjet mbrojtëse, mjetet teknike dhe kushtet e sigurisë të kërkuara për një ndërhyrje të tillë.
A ishte Klajd Zekthi i pajisur me të gjitha mjetet e sigurisë? A kishte ekipi në terren pajisjet e duhura për ndërhyrje në kushtet e krijuara nga stuhia? A ishin respektuar të gjitha protokollet e sigurisë?
Këto janë pyetje që tashmë kërkojnë përgjigje nga OSHEE, ndërsa rrethanat e sakta të ngjarjes pritet të përcaktohen nga hetimi i autoriteteve.
Humbja e jetës së një punonjësi në krye të detyrës e bën edhe më urgjente verifikimin e kushteve të punës së elektricistëve që përballen çdo ditë me situata të rrezikshme në terren.
InfoNews.al do të ndjekë hap pas hapi hetimin dhe do të sjellë çdo të dhënë të re mbi rrethanat e tragjedisë, si dhe përgjigjet që OSHEE dhe institucionet përgjegjëse do të japin për kushtet e sigurisë në punë.
