Protesta kundër bashkimit të Bashkisë Divjakë me Bashkinë e Lushnjës ka hyrë në ditën e 22-të.
Gjatë tubimit të mbrëmjes, banorët përsëritën kërkesat e tyre kundër shkrirjes së bashkisë dhe kërkuan që Divjaka të vijojë të funksionojë si njësi e veçantë administrative.
Protestuesit iu drejtuan edhe deputetëve të zonës dhe anëtarëve të Këshillit Bashkiak, duke u kërkuar të mbajnë qëndrim në mbështetje të kundërshtimit të bashkimit me Lushnjën.
Në fokus të protestës ishin edhe deklaratat kundër ministrit të Shtetit për Pushtetin Vendor, Arbjan Mazniku. Qytetarët kërkuan me tone ironike që ai të shpallet “non grata” në Divjakë, teksa e bënë përgjegjës politikisht për procesin e riorganizimit territorial.
Kritika pati edhe ndaj deputetit socialist Erion Braçe. Protestuesit rikujtuan qëndrimet e tij të mëparshme në mbështetje të Divjakës dhe ngritën pikëpyetje mbi pozicionin që ai mban sot për të ardhmen administrative të zonës.
