Prokuroria e Posaçme Kundër Korrupsionit dhe Krimit të Organizuar (SPAK) ka sekuestruar katër pasuri të paluajtshme me vlerë 1.2 milionë euro, të dyshuara si të përfituara nga mashtrimi në tregjet financiare.
Në kuadër të operacionit policor të koduar “Fraud”, është ekzekutuar vendimi i Gjykatës së Posaçme për sekuestrimin e pronave të 42-vjeçarit Erjon Kasmi, i cili ka precedent penal për mashtrim kompjuterik në bursa.
Pasuritë e sekuestruara:
1 apartament
2 vendparkime për automjete
1 subjekt tregtar
Sipas policisë, hetimet për pastrimin e parave dhe gjurmimin e pasurive me burim kriminal vijojnë, ndërsa materialet procedurale i janë referuar SPAK për veprime të mëtejshme.
NJOFTIMI I POLICISË:
Finalizohet operacioni policor i koduar “Fraud”, për gjurmimin dhe sekuestrimin e pasurive që rrjedhin nga krimi.
Operacioni, nga Seksioni për Hetimin e Pastrimit të Parave dhe Aseteve Kriminale i DVP Tiranë, në drejtimin e SPAK.
Sekuestrohen 4 pasuri të paluajtshme, me vlerë rreth 1 200 000 euro, të një shtetasi me precedent për mashtrim kompjuterik në bursa.
Në vijim të punës gjurmuese dhe hetimore, për konstatimin dhe sekuestrimin e pasurive që rrjedhin nga veprimtaritë kriminale, u finalizua operacioni i koduar “Fraud”, në kuadër të të cilit u ekzekutua vendimi i GjKKO-së, për sekuestrimin e 4 pasurive të shtetasit E. K., 42 vjeç, banues në Tiranë.
Konkretisht, u vendos sekuestro mbi 1 aparament, 2 vendparkime për automjete dhe 1 subjekt tregtar, pasuri të cilat dyshohet se rrjedhin nga veprimtaria kriminale e 42-vjeçarit, në fushën e mashtrimit kompjuterik, në bursa.
Materialet procedurale iu referuan SPAK-ut, për veprime të mëtejshme.
