Një zjarr ka përfshirë mesditën e sotme një godinë të vogël në zonën e Zvërnecit, pranë lagunës së Nartës në Vlorë.
Ngjarja është regjistruar rreth orës 14:00. Godina shërbente si magazinë për ruajtjen e materialeve të peshkimit, ndërsa flakët rrezikuan të përhapeshin edhe në një sipërfaqe pyjore me pisha që ndodhej pranë saj.
Falë ndërhyrjes së shpejtë të forcave zjarrfikëse të Vlorës, zjarri u vu nën kontroll dhe u shmang përhapja e flakëve në pyllin përreth.
Nga të dhënat paraprake dyshohet se shkaku i zjarrit ka qenë një shkëndijë elektrike.
Fatmirësisht, nga incidenti nuk raportohet për persona të lënduar, ndërsa janë shkaktuar vetëm dëme materiale. Autoritetet pritet të kryejnë verifikimet për të përcaktuar shkakun e saktë të rënies së zjarrit.
