Një tjetër skemë e dyshuar për tjetërsimin e pronave shtetërore është zbuluar në Durrës, duke çuar në vendosjen e 12 masave të sigurisë ndaj ish-funksionarëve të Hipotekës dhe personave që dyshohet se kanë përfituar prona në mënyrë të paligjshme.
Hetimi disa-vjeçar i Prokurorisë së Durrësit ka nxjerrë dyshime për falsifikim dokumentesh, mashtrim, shpërdorim detyre dhe pastrim të produkteve të veprës penale. Autoritetet po vijojnë verifikimet për mënyrën e regjistrimit dhe kalimit të pronave.
Sipas dosjes hetimore, problemet janë evidentuar gjatë inventarizimit të regjistrave hipotekorë në Drejtorinë Vendore të Kadastrës Durrës. Nga 1.063 regjistra të kontrolluar, vetëm 152 rezultuan pa problem, ndërsa 908 regjistra u konstatuan me dëmtime ose ndërhyrje të dyshuara, përfshirë faqe të zhdukura, të zëvendësuara, të dubluara apo të vendosura jashtë rendit kronologjik.
Prokuroria dyshon se këto ndërhyrje në dokumentacion mund të jenë përdorur për manipulimin e të dhënave të pronësisë dhe kalimin e pasurive shtetërore në favor të subjekteve private. Masat e sigurisë përfshijnë arrest me burg për 4 persona, arrest në shtëpi për 4 të tjerë dhe detyrim paraqitjeje për 4 persona të tjerë, të dyshuar për vepra të ndryshme penale që lidhen me falsifikimin e dokumenteve, mashtrimin dhe shpërdorimin e detyrës.
Lista e plotë:
Ramazan Sheshi – arrest me burg – i dyshuar për veprat penale të “Mashtrimit”, “Falsifikimit të dokumenteve” dhe “Pastrimit të produkteve të veprës penale ose veprimtarisë kriminale”.
Adrian Kona – arrest me burg, i dyshuar për veprat penale të “Falsifikimit të dokumenteve” dhe “Shpërdorimit të detyrës”.
Bledar Zerba – arrest me burg, i dyshuar për veprat penale të “Falsifikimit të dokumenteve” dhe “Shpërdorimit të detyrës”.
Rovin Zeqja – arrest me burg, i dyshuar për veprat penale të “Falsifikimit të dokumenteve” dhe “Shpërdorimit të detyrës”.
Shaqir Sheshi – arrest në shtëpi, i dyshuar për veprat penale të “Mashtrimit” dhe “Falsifikimit të dokumenteve”.
Viktor Mataj – arrest në shtëpi, i dyshuar për penale të “Mashtrimit” dhe “Falsifikimit të dokumenteve”.
Arianit Mataj – arrest në shtëpi, i dyshuar për penale të “Mashtrimit” dhe “Falsifikimit të dokumenteve”.
Besnik Xhafa – arrest në shtëpi, i dyshuar për penale të “Mashtrimit” dhe “Falsifikimit të dokumenteve”.
Fiqeret Xhafa – detyrim paraqitje, i dyshuar për veprat penale të “Mashtrimit”, “Falsifikimit të dokumenteve” dhe “Pastrimit të produkteve të veprës penale ose veprimtarisë kriminale”.
Jonida Mergeja – detyrim për paraqitje, e dyshuar për veprën penale të “Shpërdorimit të detyrës”.
Leandro Dervishi – detyrim për paraqitje i dyshuar për veprën penale të “Shpërdorimit të detyrës”.
Artur Çobani – detyrim për paraqitje i dyshuar për veprën penale të “Shpërdorimit të detyrës”.
