Prokuroria e Posaçme ka dërguar për gjykim kryebashkiakun e Shkodrës, Benet Beci, i cili akuzohet për shkelje të barazisë në tendera, së bashku me gjashtë persona të tjerë.
Hetimi lidhet me një procedurë të zhvilluar në kohën kur Beci drejtonte KESH-in, në fund të vitit 2019 për një kontratë studimore me vlerë rreth 800 mijë euro me TVSH, e cila kishte të bëjë me përgatitjen e një “strategjie të zhvillimit të sektorit energjetik”.
Sipas SPAK, dokumentacioni dhe mënyra e hartimit të tenderit krijuan kushtet që gara të mos ishte reale dhe fituesi të ishte paracaktuar. Në fund, kontrata u fitua nga Consulting & Management Albania, kompania e vetme që mori pjesë, me një ofertë thuajse identike me fondin limit.
Prokuroria pretendon se Beci dhe strukturat përkatëse të prokurimit kanë manipuluar disa faza të procesit, duke përllogaritur paraprakisht fondin, duke kufizuar kriteret e konkurimit dhe duke ndikuar në vlerësimin e ofertës, me qëllim që kompania e caktuar të merrte kontratën pa garë.
Rrjedha e ngjarjeve u zbulua gjatë hetimeve për ish-drejtorin e ARRSH-së, Evis Berberi. Gjatë kontrolleve, hetuesit sekuestruan telefonin e bashkëshortes së tij, Adela Ruko, e cila kryesonte komisionin e vlerësimit në tenderin e KESH-it.
Në celular u gjetën komunikime të drejtpërdrejta mes Berberit dhe Becit, të cilat, sipas dosjes, e lidhin tenderin me një marrëveshje paraprake për ndarjen e parave.
Mesazhi që ndezi hetimet është ai në të cilin Berberi i shkruan Becit: “500 mijë euro për profesorët e Harvardit, 320 mijë euro për ne me dy klasë shkollë.”
Të pandehurit
Përveç Benet Becit, në bankën e të akuzuarve shkojnë:
Adela Ruko – kryetare e Komisionit të Vlerësimit të Ofertave (bashkëshortja e Evis Berberit)
Jonid Kazani – anëtar i Njësisë së Prokurimit
Edlira Mitrushi – anëtare e Njësisë së Prokurimit
Yllka Nishku – anëtare e Njësisë së Prokurimit
Rudin Gjoni – anëtar i Komisionit të Vlerësimit
Premtim Dauti – anëtar i Komisionit të Vlerësimit
