Kandidatja për deputete nga Partia Demokratike, Jorida Tabaku, ka vizituar sot një fasoneri, ku pati mundësinë të bisedojë nga afër me punonjësit dhe drejtuesit e saj. Gjatë takimit, Tabaku shprehu vlerësimin e saj për punëtorët dhe theksoi angazhimin e Partisë Demokratike për mbështetje konkrete të bizneseve dhe përmirësimin e kushteve të punës.
Ajo premtoi uljen e taksave për bizneset nga 50% në 10%, si dhe uljen e sigurimeve shoqërore, duke synuar rritjen e të ardhurave reale për punonjësit dhe zhvillimin e qëndrueshëm të biznesit.
“Nëse ulet taksa për biznesin nga 50% në 10%, nëse ulen sigurimet shoqërore, kjo do të thotë më shumë lekë në xhepat tuaj”, deklaroi Tabaku, duke shtuar se “forca e ekonomisë gjendet pikërisht tek bizneset dhe tek njerëzit e punës si ju”.
Në bisedë me punonjëset gra, Tabaku kërkoi mbështetje përmes votës preferenciale në listën e hapur, duke e konsideruar këtë si një votë të drejtpërdrejtë besimi dhe mbështetjeje për të përfaqësuar gratë dhe punëtorët në parlament.
Në fund, Tabaku vizitoi edhe ambientet e punës duke vlerësuar angazhimin dhe përkushtimin e punonjësve në një sektor që është prekur ndjeshëm nga kriza ekonomike dhe rënia e euros.
