Franca ka lëshuar urdhër-arreste ndërkombëtare për tre shtetas iranianë, të dyshuar si të përfshirë në sulmin kibernetik të tetorit, i cili goditi sistemet e frigoriferëve në qindra supermarkete në të gjithë vendin.
Ndërkohë, autoritetet iraniane kanë mohuar akuzat e ngritura nga Parisi, duke i cilësuar ato si të pabaza dhe me prapavijë dashakeqe.
Sulmi kibernetik ndodhi gjatë natës së 11 tetorit dhe preku sistemet e ftohjes në rreth 700 pika supermarketesh në Francë. Sipas hetimeve, hakerat dyshohet se ndërhynë në parametrat e procesit të shkrirjes së frigoriferëve, duke shkaktuar rritjen e temperaturave, prishjen e produkteve ushqimore dhe të paktën 15 zjarre.
Prokurorja e Parisit, Laure Beccuau, bëri të ditur se autoritetet kanë nisur një hetim zyrtar ndaj grupit të hakerave Shahid Kaveh, të cilin Ministria e Jashtme franceze e lidh me Gardën Revolucionare Islamike të Iranit (IRGC).
Në kuadër të hetimeve, prokuroria ka kërkuar fletëarreste ndërkombëtare për tre persona: Hamid Reza Lashgarian, Mahdi Lashgarian dhe Reza Salarvand. Ata dyshohen se kanë pasur role drejtuese në organizimin e sulmeve kibernetike.
Sipas autoriteteve franceze, Hamid Reza Lashgarian dyshohet se drejton Qendrën Elektronike dhe Kibernetike të Gardës Revolucionare Islamike, ndërsa Mahdi Lashgarian dhe Reza Salarvand identifikohen si komandantë të njësisë Shahid Kaveh.
Hetuesit francezë pretendojnë se kjo njësi ka vepruar përmes disa grupeve të frontit, mes tyre CyberAveng3rs dhe Cyber Isnaad Front, të cilat dyshohet se janë përdorur për të realizuar operacionet kibernetike.
Në cilësinë e provave, autoritetet franceze kanë evidentuar gjurmë të gjuhës perse (Farsi) në infrastrukturën e përdorur gjatë sulmit, si dhe adresa interneti që lidhen me pajisje të lokalizuara në Iran.
Hetimet vijojnë për të përcaktuar plotësisht përgjegjësinë e personave të dyshuar dhe lidhjet e tyre me strukturat iraniane.
