Forcat RENEA dhe ato të FNSH pritet të mbërrijnë në burgun e Peqinit, atje ku ka pasur një përplasje mes 3 të dënuarve përjetë: Sokol Mjacaj, Indrit Shaqja dhe Arben Lleshi. Ky i fundit raportohet se ka humbur jetën si pasojë e një të shtëne me armë.
Vrasja ka ndodhur me një pistoletë, e cila nuk dihet se si ka hyrë në burgun e sigurisë së lartë të Peqinit, por dyshohet se është përdorur një dron.
Konflikti mes 3 të dënuarve me burgim të përjetshëm ka ndodhur në ajrim, ndërsa Sokol Mjacaj është identifikuar si autori i krimit të rëndë brenda burgut.
Raportohet se asnjë prej gardianëve apo punonjësve të burgut nuk është lënduar nga ngjarja.
Viktima Arben Lleshi vuante dënimin për vrasjen e bashkëkombësit të tij Agim Hoxha, ngjarje e ndodhur në Sauthempton. Krimi ndodhi më 10 prillin e 2013 kur Arben Lleshi 27 vjeç, i njohur si shpërndarës droge në Angli, dogji të gjallë brenda në makinën e tij Agim Hoxhën 29 vjeç në Sauthempton të Anglisë.
Ndërkohë, Sokol Mjacaj, i dyshuar si autor i vrasjes së Lleshit brenda burgut të Peqinit, vuante dënimin me burgim të përjetshëm për vrasjen e dy turistëve çekë, Michal Svatos dhe Anna Kusinova, më 3 korrik 2015 në fshatin Prekal të Dukagjinit. Mjacaj i grabiti dy të rinjtë e më pas i ekzekutoi me armë zjarri në automjetin e tyre. Pas kryerjes së krimit Mjacaj u largua nga vendngjarja dhe u ul në një kafene të fshatit për të porositur kafe.
Sokol Mjacaj u arrestua dy ditë më pas më 5 korrik 2015. Më 5 korrik 2022 Gjykata e Lartë la në fuqi dënimin, burg përjetë për Sokol Mjacajn. Ky dënim ishte dhënë nga Gjykata e Apelit të Shkodër në 2018.
Tre të akuzuarit për vrasjen e dy të moshuarave Elsa e Gjinofeva Vava, mesnatën e 1 shtatorit të 2014, kanë dalë në gjyq së bashku. Indrit Shaqja, nga Shijaku, Velson Elmazi nga Elbasani kushëriri i tij dhe nipi i dy viktimave Artur Kacanolli janë përballur me trupin gjykues dhe prokuroren, përpara dhënies së konkuluzioneve përfundimatre të vendimit.
Indrit Shaqja nga Shijaku vuan dënimin me burgim të përjetshëm për vrasjen e dy grave të moshuara me qëllim grabitjen e tyre.
“Unë jam autori asnjë prej të arrestuarve të tjerë nuk ka faj. Nipi i viktimave është shoku im, por ai nuk e dinte çfarë do të bëja në shtëpinë e tezes dhe nuses së dajës. Nuk e dija që kishte njerëz në atë shtëpi. Shkova të merrja ndonjë send me vlerë ndonjë televizor apo çfarë të gjeja, kur më doli plaka e parë u tremba. Edhe ajo u tremb shumë, e kam lidhur me çafrçaf dhe e hodha në krevat. Më pas ka dalë plaka e dytë. Edhe atë e kam lidhur me çarçaf. Kur jam larguar i kam lënë mirë, merrnin frymë. Por në mëngjes e mësova lajmin nga televizori dhe jam arratisur në Kosovë, në Itali e më pas në Spanjë. Më zuri paniku nuk doja të përfundoja në burg” ka thënë para trupit gjykues Shaqja, i cili u ekstradua nga Inetrpoli si autori i grabitjes me pasojë vdekjen e të moshuarave.
