Një konflikt mes dhjetëra të miturve është parandaluar në zonën e Yzberishtit, në Tiranë, pas ndërhyrjes së menjëhershme të shërbimeve të Komisariatit të Policisë Nr. 6.
Sipas policisë, pas marrjes së informacionit se një grup të miturish do të përfshiheshin në një konflikt në rrugën “Besim Alla”, efektivët kanë ndërhyrë në kohë duke shkuar në zonën e sinjalizuar.
Gjatë ndërhyrjes, disa prej të miturve janë konstatuar të pajisur me shkopinj bejsbolli, të cilët dyshohet se do të përdoreshin gjatë konfliktit. Policia ka shoqëruar fillimisht këta të mitur, ndërsa më pas ka identifikuar dhe shoqëruar edhe të tjerët që pritej të përfshiheshin në përplasje
Në përfundim të veprimeve hetimore dhe procedurale, të kryera në prani të prindërve dhe psikologut, materialet janë referuar në Prokurori. Në gjendje të lirë po procedohen penalisht 23 të mitur, të moshave 13 deri në 17 vjeç.
Ndërkohë, gjatë ndërhyrjes janë sekuestruar dy shkopinj bejsbolli.
