Kristiola Rama, vajza e madhe e familjes Rama nga Frashëri i Patosit, rrëfeu për mediat momentin kur mësoi për vdekjen e të atit, ndërsa ishte kthyer nga Italia për ceremoninë e varrimit.
E emigrantë në Itali dhe nënë e tre fëmijëve, Kristiola mbërriti në vendlindje një ditë më parë, por mori një informacion ndryshe nga ai që i dha motra e vogël, Emanilda.
“Nga ora 8:00 më mori motra në telefon dhe më tha se babi kishte rënë në banjo dhe pastaj fik telefonin. Pas pak, mami më tha se po merreshin me babin, si duket po e vishnin apo po e lanin. Kur mora mamin në telefon, dëgjova një zë të pazakontë dhe e pyeta ‘a është babi gjallë?’. Më tha ‘Jo, ka vdekur’”, tregoi Kristiola me një qetësi që vetëm dhimbja mund ta shpjegojë.
Ajo shtoi se me babanë kishte folur rregullisht dhe nuk kishte pasur asnjë shqetësim për shëndetin e tij: “Unë jetoj në Itali dhe flisja përditë me prindërit dhe motrën. Babi ishte mirë. Nuk di të ketë pasur ndonjë problem.”
Pas humbjes së babait, familja Rama po përballet me një dhimbje të madhe, ndërsa i gjithë komuniteti në Patos i shpreh ngushëllimet më të thella.
26-vjeçarja Emanilda Rama mbyti babanë e saj, Anesti Rama, duke përdorur një tel. Mësohet se marrëdhënia mes tyre ishte tensionuar prej kohësh dhe konfliktet shpesh ishin të ashpra. Pas krimit, vajza u arrestua dhe po hetohet edhe nëna e saj, për dyshimet e përfshirjes në fshehjen e provave./News24
