Gazetari Enrik Mehmeti, është përcjellë këtë të diel për në banesën e fundit, një ditë pasi humbi jetën tragjikisht në një aksident me motor në zonën e Porto Novës, në Zvërnec.
Ceremonia mortore u parapri nga homazhet e zhvilluara në ambientet e teatrit “Petro Marko” në Vlorë, ku familjarë, miq, kolegë, qytetarë dhe përfaqësues të politikës u mblodhën për t’i dhënë lamtumirën e fundit gazetarit 40-vjeçar. Mes pjesëmarrësve ishte edhe kryeministri Edi Rama.
Humbja e Enrik Mehmetit ka prekur thellë komunitetin e gazetarëve dhe qytetin e Vlorës, ku ai ushtroi profesionin për shumë vite. Me raportimet e tij nga terreni dhe angazhimin në mbulimin e zhvillimeve kryesore të jugut të vendit, ai u bë një nga emrat më të njohur të gazetarisë lokale.
Mehmeti ndoqi nga afër ngjarjet më të rëndësishme të qarkut të Vlorës, duke raportuar mbi kronikën, operacionet policore, zhvillimet politike, problematikat sociale dhe turizmin. Ai vlerësohej nga kolegët për profesionalizmin, seriozitetin dhe gatishmërinë për të qenë gjithmonë në vendin e ngjarjes.
Gazetari u nda nga jeta në moshën 40-vjeçare, duke lënë pas bashkëshorten dhe dy fëmijët.
