Përveç dyshimeve për përvetësimin e 69 milionë lekëve, Prokuroria ka argumentuar edhe ekzistencën e rrezikut që të dyshuarit mund t’i shmangen drejtësisë.
Në dosjen hetimore thuhet se drejtoresha e Filialit të Postës Shqiptare në Durrës, Elisabeta Mataj, rezulton të ketë dalë nga territori shqiptar më 10 korrik 2026 nëpërmjet Pikës së Kalimit Kufitar Kapshticë.
Sipas sistemit TIMS, ajo është larguar në orën 19:47 me automjet me targa AB320ZR.
Prokuroria thekson se pas kësaj date nuk rezulton hyrje e rregullt e saj në territorin shqiptar.
Megjithatë, më 15 korrik, ajo është paraqitur për t’u marrë në pyetje nga organet e hetimit.Ky fakt, sipas Prokurorisë, ngre dyshime për mënyrën e rikthimit të saj në vend dhe përbën një element që tregon rrezik të mundshëm për shmangie nga drejtësia.
Në dosje thuhet se, duke pasur parasysh vlerën e dëmit të dyshuar, kohëzgjatjen e skemës dhe veprën penale për të cilën hetohen, ekziston një rrezik real që edhe dy të dyshuarat e tjera, Valbona Duni dhe Paola Dana, të largohen nga vendi.Pikërisht mbi këto argumente, Prokuroria ka mbështetur kërkesën për masa sigurie, duke vlerësuar se rreziku i largimit është “evident, aktual dhe i sigurt”.
Ndërkohë, hetimet vijojnë për të sqaruar të gjithë mekanizmin e skemës së dyshuar dhe për të verifikuar përgjegjësinë penale të secilit prej personave të përfshirë.
