Komuniteti shqiptar në Itali pritet të zhvillojë të dielën, më 20 shtator, një marshim në Milano në mbështetje të protestave që prej javësh po zhvillohen në Tiranë.
Aktiviteti organizohet pas 17 protestash të njëpasnjëshme në kryeqytetin shqiptar dhe synon të shprehë solidaritetin e shqiptarëve që jetojnë jashtë vendit me protestuesit në Tiranë.
Sipas njoftimit të organizatorëve, në marshim pritet të marrin pjesë edhe eurodeputetë.
Thirrja për pjesëmarrje u drejtohet shqiptarëve që jetojnë në Lombardi, në qytete të tjera të Italisë së Veriut, si edhe në zona të ndryshme të Zvicrës, me synimin për të mbledhur një numër sa më të madh pjesëmarrësish.
Organizatorët u kanë bërë thirrje gjithashtu gazetarëve dhe korrespondentëve shqiptarë në Milano që ta ndjekin aktivitetin dhe ta pasqyrojnë atë mediatikisht.
Njoftimi:
Të dielën, më datë 20 shtator, pas 17 protestash radhazi, në Milano do të zhvillohet një marshim në mbështetje të protestave në Tiranë. Në këtë aktivitet pritet të jenë të pranishëm edhe eurodeputetë.
Ju lutem, me mirësjellje, shpërndajeni posterin dhe këtë njoftim me miqtë, të afërmit dhe komunitetet shqiptare që jetojnë në Lombardi, por edhe në qytete dhe zona të tjera të Italisë së Veriut dhe Zvicrës, në mënyrë që të kemi një pjesëmarrje sa më të gjerë.
Gjithashtu, nëse në këtë grup ka gazetarë, ju lutem të njoftoni edhe kolegët tuaj, veçanërisht korrespondentët në Milano, nëse kanë mundësi ta ndjekin këtë aktivitet dhe të realizojnë një kronikë apo shërbim mediatik në lidhje me marshimin.
Ju falënderoj të gjithëve për mbështetjen dhe për përhapjen e këtij njoftimi!
