Presidenti serb Aleksandar Vuçiç ka njoftuar se do të largohet nga detyra më 27 shtator, por largimi nga Presidenca nuk do të thotë tërheqje nga politika.
Vuçiç ka deklaruar se synon të kandidojë për postin e kryeministrit në zgjedhjet e parakohshme të 25 tetorit, duke kërkuar të vijojë qëndrimin në krye të politikës serbe përmes një tjetër posti.
Vendimi vjen pas një periudhe të gjatë protestash të udhëhequra nga studentët, të cilat nisën pas tragjedisë në stacionin hekurudhor të Novi Sadit në nëntor 2024, ku humbën jetën 16 persona.
Protestuesit akuzojnë qeverinë e Vuçiçit për korrupsion dhe ndikim mbi mediat, ndërsa kërkojnë reforma dhe institucione më të pavarura. Autoritetet serbe i kanë kundërshtuar këto akuza.
Ndërkohë, në Beograd janë mbledhur mijëra mbështetës të opozitës dhe lëvizjes studentore “Studentët fitojnë”, e cila synon të marrë pjesë në zgjedhjet e 25 tetorit. Kandidatët e saj kanë dorëzuar firmat e nevojshme, ndërsa disa parti opozitare kanë shprehur mbështetje për lëvizjen.
