Avokati dhe aktivisti Altin Goxhaj ka reaguar përmes një postimi në rrjetet sociale, ku denoncon atë që e cilëson si ndjekje penale ndaj aktivistit Andrea Bregu.
Sipas Goxhajt, ndaj Bregut janë kërkuar 3 vite burg dhe deri në 30 milionë lekë të vjetra gjobë, duke u referuar, sipas tij, në Nenin 55 të Kodit Penal, të cilin ai e krahason me nenin për “agjitacion dhe propagandë” të periudhës së diktaturës komuniste.
Në reagimin e tij, Goxhaj shprehet se Andrea Bregu do ta fitojë çështjen në çdo shkallë gjyqësore, ndërsa shton se aktualisht janë tre persona që, sipas tij, po përballen me procese gjyqësore: Andrea Bregu, Dorina Mema dhe vetë ai, si avokat.
Postimi përmban gjithashtu deklarata dhe slogane të artikuluara më herët nga aktivisti Andrea Bregu, të cilat Goxhaj i rikujton në reagimin e tij, duke theksuar se qëndrimi i tyre mbetet i pandryshuar.
“E vetmja fjalë që kemi të tre: ‘Larg duart nga fëmijët e Shqipërisë’”, shkruan Goxhaj, duke e mbyllur reagimin me tone të forta kundër asaj që ai e quan një axhendë ideologjike.
