Personat që shikoni në foto janë 4 të arrestuarit nga policia ditën e sotme, Marsel Varka, Elsaed Maqinaj, Fabian Zako dhe Kristaq Biba në kuadër të operacionit që çoi në goditjen e një grupi që shiste armë dhe eksplozivë në Tiranë.
Sipas policisë, këta persona së bashku me të tjerët të arrestuar më parë siguronin dhe shisnin në zona të ndryshme të Tiranës armë zjarri, lëndë plasëse dhe municion luftarak.
Ndërsa në kërkim janë shpallur Kevin Vila dhe Bledar Avdillari.
Policia iu sekuestroi 7 armë zjarri (4 pistoleta dhe 3 automatikë), municion luftarak dhe sende të tjera që do t’i shërbejnë hetimit.
Hetuesit kanë dokumentuar edhe çmimet që anëtarët e këtij rrjeti aplikonin në tregun e zi për shitjen e armatimit. Pistoletat shiteshin prej tyre me çmime që shkonin deri në 1500 euro, ndërsa armët automatike të llojit kallashnikov kapnin vlerën deri në 2500 euro, në varësi të porosive.
Grupi kishte ngritur një rrjet të shtrirë në terren dhe bazat ku ata vepronin ose mbanin armatimin ishin të vendosura në disa zona të ndryshme të Tiranës, çka bënte që aktiviteti të ndryshonte shpesh lokacion për t’i shpëtuar vëzhgimit të policisë.
Operacioni vijon për kapjen e dy shtetasve të shpallur në kërkim, Kevin Vila dhe Bledar Avdillari, si dhe për dokumentimin e plotë të personave të tjerë të përfshirë në këtë veprimtari të paligjshme
