Aleksandros Angjelopulos, një nga figurat më të njohura të botës së krimit në Greqi, i njohur si “Alekos” ose “Fat” (i shëndoshi), punoi fillimisht si marinar në anije të vjetra që transportonin cigare kontrabandë nga Shqipëria drejt Italisë, një rrugë e njohur kontrabande në vitet ’90.
Këto lëvizje përmes Shqipërisë konsiderohen si hapat e parë të përfshirjes së tij në rrjetet ndërkombëtare të krimit të organizuar, përpara se të zhvendosej në Belgjikë dhe më pas të përfshihej në trafik armësh dhe droge në shkallë të gjerë.
Aktiviteti i tij kriminal u zgjerua ndjeshëm, duke kaluar nga kontrabanda e cigareve në trafik armësh dhe më vonë në trafik ndërkombëtar kokaine, me rrugë që shtriheshin nga Amerika Latine drejt Evropës.
Autoritetet greke dhe ndërkombëtare theksojnë se përdorimi i rrugëve ballkanike, përfshirë edhe Shqipërinë, ka qenë pjesë e fazës së hershme të ndërtimit të perandorisë së tij kriminale, e cila më vonë do ta kthente atë në atë që mediat e quajtën “Eskobari grek”.
Si Aleksandros Angjelopulos ndërtoi një perandori ndërkombëtare droge?
“Alekos”, ose Aleksandros Angjelopulos, i njohur gjerësisht nga mediat si “Eskobari grek”, ishte një nga figurat më të fuqishme të trafikut të drogës në Greqi dhe në Evropë. I lindur në Neoi Pori të Pierias, ai ishte djali i një polici, fakt që për shumë vite i dha mundësi të lëvizte pa rënë lehtë në sy të autoriteteve. Fillimet e tij ishin modeste dhe të paligjshme njëkohësisht, si roje nate në klube dhe më pas si marinar në anije kontrabande.
Në fazën e parë të aktivitetit kriminal, Angjelopulos u përfshi në kontrabandën e cigareve, duke përdorur rrugë detare që lidhin Shqipërinë me Italinë. Këto rrugë u shfrytëzuan si shkollë praktike për botën e krimit, ku ai krijoi kontakte me rrjete ballkanike dhe ndërkombëtare. Me kalimin e kohës, aktiviteti i tij u zgjerua në trafik armësh dhe më pas në narkotikë të fortë, kryesisht kokainë.
Më vonë ai u vendos në Antwerpen të Belgjikës, ku forcoi pozitën e tij financiare dhe shoqërore, duke ndërtuar një profil të dyfishtë: nga njëra anë biznesmen me interesa në kompani mode, baste sportive dhe futboll, dhe nga ana tjetër drejtues i një rrjeti të sofistikuar kriminal. Sipas autoriteteve, ai bashkëpunoi me kartele kolumbiane dhe përdori anije peshkimi për të transportuar tonelata kokaine drejt Evropës.
Kulmi i veprimtarisë së tij erdhi në fillim të viteve 2000, kur u akuzua për disa dërgesa të mëdha kokaine dhe për pastrim parash në vlera dhjetëra milionë euro. Edhe pse u dënua fillimisht me burgim të përjetshëm, dënimi iu reduktua më vonë, përpara se të rikthehej sërish në burg. Historia e tij mbetet një nga rastet më të bujshme të krimit të organizuar grek, duke treguar se si u ndërtua një perandori ndërkombëtare droge
