Kompania SORI-AL mbetet në qendër të skandalit të helmimit të rreth 60 studentëve të Akademisë së Sigurisë, ngjarje e përsëritur dhe që aktualisht po hetohet nga autoritetet. Rasti ka vënë në pikëpyetje rolin e institucioneve kontrolluese dhe mënyrën si janë verifikuar kontratat publike të ushqimit në institucione të ndjeshme.
“SORI-AL”, e kontraktuar për shërbimin e kateringut në Akademinë e Sigurisë, është në pronësi të Alma Tafanit, bashkëshortes së Nikolin Jakës, kreut të Dhomës së Tregtisë dhe Industrisë në Tiranë.
Në shkurt të vitit 2025, kompania fitoi kontratën për “Shërbim gatimi dhe shpërndarje ushqimi për punonjësit e Policisë së Shtetit, studentët dhe kursantët në Akademinë e Sigurisë”, me vlerë rreth 2.7 miliardë lekësh dhe ka për detyrë të sigurojë tre vakte në ditë deri në vitin 2027.
Dy incidentet e regjistruara ngrejnë pikëpyetje jo vetëm për sigurinë e shërbimit në Akademinë e Sigurisë, por edhe për kontratat e tjera që kompania administron në institucione publike kritike.
Nëse hetimet vërtetojnë përgjegjësinë e kompanisë në rastin e helmimit, atëherë rreziku mund të shtrihet shumë më gjerë. Kompania e Alma Tafanit rezulton se ka aktivitet edhe në institucione ku standardet e sigurisë ushqimore duhet të jenë maksimale.
“SORI-AL” ofron ushqim edhe për Spitalin Universitar “Shefqet Ndroqi”, Spitalin Psikiatrik “Ali Mihali” në Vlorë dhe Spitalin Rajonal të Beratit.
Kontrata për spitalin “Shefqet Ndroqi” është fituar në vitin 2023 nga Operatori i Blerjeve të Përqendruara Operatori i Blerjeve të Përqendruara, në vlerë rreth 3 milionë euro, pa konkurrencë, me shërbim deri në vitin 2027.
Po nga ky institucion, kompania fitoi në vitin 2024 edhe kontratën për Spitalin Psikiatrik “Ali Mihali” në Vlorë, me vlerë rreth 3.1 milionë euro, ku është skualifikuar oferta tjetër që ishte dukshëm më e ulët, dhe me afat deri në vitin 2028.
Gjithashtu, “SORI-AL” vijon shërbimin edhe në Spitalin Rajonal të Beratit, me kontratë rreth 1.1 milionë euro deri në vitin 2028, si dhe në disa reparte ushtarake të vendit.
Nëse hetimi konfirmon probleme me sigurinë ushqimore, atëherë nuk do të bëhet më fjalë për një incident të izoluar, por për një rrezik potencial në disa institucione kritike të vendit.
Ngjarja ngre gjithashtu pikëpyetje serioze mbi funksionimin e sistemit të kontrollit shtetëror, ku alarmi është dhënë më herët, por nuk është shoqëruar me masa parandaluese efektive për të shmangur përsëritjen e rasteve./vna.al
