Gjykata e Apelit ka liruar nga burgu Davide Pecorelli, i cili u dënua në vendin tonë pasi inskenoi vdekjen e tij.
Gjykata ndryshoi akuzën nga shkatërrim prone me zjarr me pasoja të rënda dhe e deklaroi fajtor për shkatërrim prone me zjarr.
Për këtë akuzë Pecorreli u dënua me 8 muaj burgim. Ai u deklarua fajtor për veprën penale dhunim varresh dhe dënimin me 8 muaj burgim. Në bashkim dënimesh, e dënoi përfundimisht me 14 muaj burgim. Në zbatim të përfitimit nga gjykimi i shkurtuar, i ulet 1/3 dhe përfundimisht dënohet me 9.6 muaj burgim.
Disa ditë më parë, Pecorelli deklaroi se në burg ishte infektuar me hepatit C. Ai i dërgoi letër senatorit Walter Verini, sekretar i Komietit të Drejtësisë të Senatit duke i kërkuar ndihmë.
Pecorelli pretendon se po mbahej padrejtësisht i izoluar në burgun “313” në Tiranë ku ndan një qeli të vogël me 7 persona të tjerë dhe me kushte ekstreme sanitare.
“U infektova me hepatit C, humba 12 kilogramë në 4 muaj. Ju kërkoj të merrni parasysh dëshirën time të fundit: të hedhim dritë, duke përdorur të gjitha mjetet në dispozicionin tuaj, mbi çështjen ligjore në të cilën jam i përfshirë dhe, në veçanti, mbi seancën e fundit që do të mbahet më 18 shtator 2025, në orën 18:00, në Gjykatën e Apelit të Tiranës”, shkruhet në letrën e Pecorellit, publikuar nga mediat italiane.
