Një 27-vjeçar shqiptar, Leonard Farruku i ka dhënë fund jetës së tij në Angli, në anijen Bibby Stockholm ku mbahen azilkërkuesit e regjistruar në Britani.
The Telegraph shkruan se i riu nga Durrësi ishte larguar drejt Anglisë me gomone verën e kaluar ku kishte paguar 4,000 euro (3,436 £) për të kaluar Kanalin. Lidhur me ngjarjen, motra e viktimës ka pohuar se i riu trajtohej mjerisht përpara vdekjes. Është zbuluar se 27-vjeçari ishte ankuar për shëndetin e tij mendor një ditë para se të vdiste dhe sipas emigrantëve të tjerë, ai ishte dëgjuar duke bërtitur në kabinën e tij. Motra e tij Jola Dushku, 33-vjeçe e cila jeton në Itali ka treguar se është tronditur nga lajmi, të cilin e morën vesh nga të afërmit në Mbretërinë e Bashkuar të kontaktuar nga policia që po hetonte vdekjen.
“Kur fola me të herën e fundit, ai më tha se kushtet në atë varkë nuk ishin të këqija, por ato trajtoheshin nga rojet si kafshë. Vëllai im, kur mbërriti në MB, i dha Home Office adresën e të afërmve tanë në Londër. Ata u kontaktuan nga policia e cila u tregoi se çfarë kishte ndodhur. Sipas të afërmve tanë që janë në kontakt me policinë, Leonardi atë natë në orën 23 të mbrëmjes ka pasur disa probleme dhe është qetësuar nga roja. Në orën 3 të mëngjesit ai u gjet i vdekur. Nuk kemi më shumë detaje se si ai vdiq”, ka treguar motra e tij.
Farruku mbërriti në Britaninë e Madhe me një varkë të vogël gushtin e kaluar si pjesë e një numri prej më shumë se 12,000 shqiptarësh përgjatë Kanalit, një e katërta e të gjitha kalimeve vitin e kaluar. I lindur në fshatin Manez, pranë qytetit të Durrësit, motra e tij ka treguar se i riu ka mbërritur në Mbretërinë e Bashkuar për të kërkuar punë dhe për të siguruar leje qëndrimi të pacaktuar.
