Kryeministri Edi Rama ka reaguar pas vendimit të Gjykatës Kushtetuese për mbylljen e TikTok, e cila e cilësoi vendimin e qeverisë si “cenim të lirisë së shprehjes”.
Në një reagim në X, Rama thotë se gjykata arsyeton se 90% përqind të prindërve dhe mësuesve, paskan qenë gabim.
Sipas tij, falë mbylljes arritën të merrnin masat e duhura me kompaninë dhe ta bënin sërish të aksesueshëm rrjetin social, ndërsa shton se “të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot”.
“Gjykata Kushtetuese mendoka që 90% e prindërve dhe mësuesve shqiptarë ishin gabim kur kërkuan mbylljen e TIKTOK-ut! Fatmirësisht ne e rihapëm TIKTOK-un falë mirëkuptimit që gjetëm tek kompania për masat extra që u morën prej saj, pikërisht falë mbylljes, se të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot! Falë asaj mbylljes sot prindërit dhe mësuesit mund të jenë pakëz më të lehtësuar, ndërsa falë këtij vendimi që s’dua t’ia ve emrin që ka, shpifësit mund të ndjehen të inkurajuar!”, shprehet Rama.
Ndërkohë mbyllja e TIKTOK nuk ka sjell asnjë përmirësim apo mbrojtje për të rinjtë e vendit, ku sulmet në shkolla mes nxënësve kanë vijuar.
