Një 42-vjeçar i shpallur në kërkim ndërkombëtar është ekstraduar nga Italia drejt Shqipërisë, për të vuajtur dënimin e dhënë nga drejtësia shqiptare.
Bëhet fjalë për shtetasin Sefer Selimaj, i cili ishte dënuar me 15 vite burg nga Gjykata e Shkallës së Parë për Krimet e Rënda për veprën penale “Trafikim i personave të rritur”, kryer në bashkëpunim.
Sipas Policisë së Shtetit, Selimaj ishte shpallur në kërkim ndërkombëtar pas vendimit të dhënë në vitin 2017, ndërsa u lokalizua dhe u arrestua në Itali, ku më pas u finalizuan procedurat e ekstradimit.
Pas mbërritjes në Shqipëri, 42-vjeçari iu dorëzua autoriteteve shqiptare për vijimin e ekzekutimit të dënimit me 15 vite burg.
