Prifti amerikan që asistoi në ekzekutimin e parë me azot të një të burgosuri në SHBA, tha se skena e përjetuar ishte si një film horror.
Prifti Rev. Jeff Hood tha për mediat amerikane se stafi i burgut nuk mundi ta maskonte dot tronditjen nga “shfaqja horror” që u zhvillua përpara tyre.
“Kishte tronditje dhe befasi të qartë në fytyrat e tyre,” tha prifti për The Post.
Prifti e përshkroi vdekjen 22-minutëshe të Kenneth Eugene Smith, 58 vjeç, në Alabama si një skenë nga një film i frikshëm.
“Atyre u ishte thënë se do të ishte një vdekje e shpejtë, e lehtë dhe anonime… I gjithë procesi ishte thjesht i tmerrshëm. Është një skenë që nuk do ta harroj kurrë”, tha Reverend Hood.
Hood i shpjegoi gazetës se nga vendi ku u ul në dhomën e ekzekutimit, ai mund të shihte fytyrat e oficerëve të tmerruar.
“Në këto kushte është e vështirë të dish saktësisht se çfarë po ndodh, por e di që pashë terrorin në fytyrat e njerëzve përballë meje. Kur filloi ekzekutimi dhe trupi i tij filloi të shtrembërohej, ndryshimi në shprehjen e zyrtarëve ishte i dukshëm. Ai dukej si një peshk i dalë nga uji, duke luftuar përsëri dhe përsëri. Me kalimin e minutave, tensioni në dhomë rritej, derisa më në fund u konfirmua se i dënuari me vdekje kishte ndërruar jetë,” tha ai.
