Policia e Shtetit ka njoftuar ekstradimin nga Spanja drejt Shqipërisë të 49-vjeçarit Kevin Margjoni, i njohur edhe me emrin Arjan Margjoni, i dyshuar si një prej bashkëfinancuesve dhe negociatorëve të trafikimit të 485 kilogramëve kokainë, të sekuestruara në vitin 2022 në fshatin Frakull e Madhe të Fierit.
Sipas njoftimit zyrtar, ekstradimi u realizua në kuadër të operacionit të koduar “The Wanted”, falë bashkëpunimit mes specialistëve të Drejtorisë së Interpolit në Shqipëri dhe homologëve të Interpol Madridit.
Ndaj 49-vjeçarit, në mars të vitit 2026, Gjykata e Posaçme e Shkallës së Parë për Korrupsionin dhe Krimin e Organizuar kishte caktuar masën e sigurisë “Arrest në burg”.
Margjoni akuzohet për veprat penale “Trafikimi i lëndëve narkotike”, kryer në bashkëpunim në formën e grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal” dhe “Grupi i strukturuar kriminal”.
Sipas hetimeve, 49-vjeçari dyshohet se, në kuadër të grupit kriminal ku bënte pjesë, ka luajtur rolin e një prej financuesve dhe negociatorëve për trafikimin e 485 kilogramëve kokainë.
Sasia e drogës u zbulua dhe u sekuestrua nga Policia në vitin 2022, në fshatin Frakull e Madhe të Fierit, ku kokaina ishte fshehur në thasë me pleh kimik.
Me ekstradimin e tij nga Spanja, Margjoni do të përballet me drejtësinë shqiptare për akuzat që rëndojnë ndaj tij.








