Detaje të reja janë zbuluar nga ngjarja tragjike e ndodhur në Paskuqan, ku humbi jetën Halil Picari, 65 vjeç, i punësuar si ndihmës elektricist në një objekt në ndërtim.
Sipas të dhënave paraprake, ai dyshohet se ka rënë nga kati i tetë i pallatit dhe ka ndërruar jetë në vend.
Ngjarja u tentua fillimisht të mbahej jashtë vëmendjes publike, por pas raportimit të VoxNews, Policia e Shtetit reagoi duke njoftuar arrestimin e administratorit të firmës nënkontraktore “Al Great” sh.p.k., Avni Mekshi, për shkelje të rregullave të sigurisë dhe mbrojtjes në punë.
Ajo që nuk u bë publike nga policia është identiteti i kompanisë ndërtuese, e cila sipas burimeve të VOX NEWS është “Fare Bau Albania” sh.p.k., me administrator Fabio Beshirin, djali i Shkëlqim (Çim) Beshirit.
Pavarësisht se legjislacioni shqiptar parashikon përgjegjësi të përbashkët për sigurinë në kantier, deri më tani nuk është bërë e ditur asnjë masë ndaj kompanisë ndërtuese.
Hetimet pritet të përcaktojnë përgjegjësitë ligjore dhe nëse përveç nënkontraktorit, do të ketë pasoja penale apo administrative edhe për kompaninë ndërtuese./VoxNEWS
