Kryeministri Edi Rama i ka hapur dritën jeshile pastrimit të parave të pista përmes lejeve të kullave dhe resorteve që i shpërndan vetë në Këshillin Kombëtar të Territorit dhe Ujit. Më 25 qershor 2025, në pikën 11 të rendit të ditës është futur leja për resort e Ardit Krajës.
Leja e Ndërtimit për objektin sipas shkresës së përgatitur nga Sekretariati i KKT, është për kompleksin “Verde”. Bëhet fjalë për një numër godinash banimi dhe shërbimesh 2, 3, 4, 5 dhe 6 kate mbitokë dhe 1 kat nëntokë dhe pishinë, me vendndodhje në Radhimë, Bashkia Vlorë.
Sipas dokumenteve, subjekte zhvilluese janë shoqëritë “S.A.G” sh.p.k dhe “Future Enterprises and Investments” sh.p.k. Kjo e fundit është pronë e Ardit Krajës, bosit të bixhozit në Shqipëri.
Subjekt zhvillues i projektit të resortit deklaron vetëm humbje të mëdha. Në vitin 2024 humbja e deklaruar është 68447870 lekë, ndërsa në vitin 2023 është llogaritur humbja zyrtare 79798410 lekë.
Në vitin 2022 kompania e Ardit Krajës ka deklaruar humbjen -6 802 634,00 lekë dhe në vitin paraardhës 7 328 976,00 lekë.
Normalisht, që duke deklaruar humbje të tilla, sipas ligjit, kompania duhet të kishte kaluar në faliment, por kryeministri Rama i jep leje për një ndërtim gjigant në zemër të Rivierës.
Rrjeti i kompanive të Krajës me status “Pezulluar”
Kraja e ka metodë të vetën deklarimin me humbje të kompanive. Kështu, “Fair play Bast” sha deklaronte vetëm humbje megjithëse kishte fitime kolosale.
Po kështu paraqitet kompania AAA Publishing, që së fundmi Kraja e ka kthyer me status të pezulluar. Në këtë formë, e pezulluar, shfaqet edhe shoqëria “KUOTAIDE” shpk.
E pezulluar rezultuar edhe shoqëria “S.A.R Ndërtim” shpk në pronësi të Ardit Krajës. Po ashtu me status pezulluar është kompania e tij “Tirana Capital Invest” shpk.
Këto kompani, dyshohet se Kraja i përdor për qarkullim lekësh që sigurohen nga aktivitete të paligjshme dhe më pas pezullohen në pritje të operacionit të radhës.
Pse u arrestua Kraja në Kosovë?
Më 21 mars 2024, biznesmeni 50-vjeçar, Ardit Kraja është arrestuar në Kosovë. Ai është i njohur si një prej “bosëve” të lojërave të fatit në Shqipëri, ku ka qenë pronar i kompanisë “Superbast”.
Kraja është ndaluar në pikën kufitare në Vërmicë dhe pas verifikimit ka rezultuar se ndaj tij ishin lëshuar dy urdhër-arreste të lëshuara nga dy gjykata në Kosovë.
Më konkretisht nga Gjykata Themelore në Prizren dhe Gjykata Themelore në Mitrovicë për shkak të dyshimit të bazuar se ka kryer veprën penale “Organizim i skemave piramidale dhe bixhozit të paligjshëm”.
Pas ndalimit, ndaj biznesmenit Kraja, Gjykata e Mitrovicës vendosi urdhër-arresti për 48 orë deri në momentin kur të dalë para gjykatës për t’u njohur me masën e sigurisë.
Sipas akuzës, Kraja “kreu veprimtari ilegale “organizim i jashtëligjshëm i bixhozit”, që bie në përgjegjësi të Gjykatës së Prizrenit, dhe një rast në Mitrovicë që bie nën përgjegjësinë respektive të Gjykatës Themelore në këtë qytet”. Për të dyja rastet ka pasur urdhër kundër Krajës nga të dyja gjykatat.
Ardit Kraja, tek shtetasit e Kosovës, por jo vetëm, e jepte programin online, duke përfshirë linkun dhe kodet e operimit, dhe madje edhe investonte në bizneset e tyre. Nëse një lojtar fitonte, humbjen e merrte përsipër Kraja, ndërsa në rast se lojtarët humbisni, 60 përqind të fitimit e merrte Kraja.
Sipas këtyre burimeve, ky ka qenë njëri prej ofruesve të këtij shërbimi për bixhoz në Kosovë, i cili prej disa vitesh është i paligjshëm.
Ai është pronar e ortak në shumë firma. Telashe, kërcënime me biznesmenë tjerë të bixhozit, siç ishte Ervis Martinaj. Vite më parë në luftën për kontroll dhe territorit sa i përket lojërave të fatit në tokën shqiptare, biznesmeni Ardit Kraja u kërcënua nga Ervis Martinaj- një ish-oficer policie që u lidh me biznesin e bixhozit dhe ka kohë që është deklaruar i zhdukur. Pas tij, hov mori rivali i tij në këtë biznes, Ardit Kraja.
/Gijotina.com/
