Kreu i Partisë Demokratike, Sali Berisha, ka hedhur akuza të forta në Foltoren e Kuvendit lidhur me çështjen e ish-kreut të SHISH, Vlora Hyseni, dhe hetimet që lidhen me Ergys Agasin. Berisha e ka cilësuar situatën si një goditje të rëndë ndaj sigurisë kombëtare, ndërsa ka akuzuar qeverinë për kapjen e institucioneve të sigurisë.
“Kjo seancë do hyjë në histori si seanca më e turpshme e mbledhur ndonjëherë. Sot parlamenti mblidhet si parlamenti i Ergys Agasit, si parlamenti më i papërgjegjshëm në tërë historinë kombëtare të ndonjë vendi. Sot, për çdo qytetar shqiptar, që i thotë vendit vend, sigurisë siguri, çështja e të gjitha çështjeve është shembja totale e sigurisë së vendit pasi kryetarja e Shërbimit Informativ rezulton një anëtare e grupit të strukturuar kriminal Agasi”, deklaroi Berisha.
Ai riktheu akuzat e tij ndaj Ergys Agasit, duke pretenduar se ky i fundit kishte pasur ndikim të gjerë mbi institucionet shtetërore dhe grupet kriminale.
“Në këtë sallë kam deklaruar, kam paralajmëruar se Ergys Agasi është mafiozi më i rrezikshëm i Evropës. Po, sepse ai kontrollonte si asnjë tjetër në Shqipëri dhe në Evropë, të gjitha kartelet e drogës, të gjithë internetin e territorit të vendit, të gjitha sekretet e këtij shteti dhe SHISH-in. Ai kishte fuqi të pakufizuar dhe këtë fuqi e kishte nga Padrino i vendit”, tha kryedemokrati.
Berisha u ndal edhe te emërimi i Vlora Hysenit në krye të SHISH, duke e cilësuar atë si një vendim të papërgjegjshëm dhe duke përsëritur akuzat për lidhje me Edi Ramën dhe Aleksandër Vuçiç.
“Rasti i Vlora Hysenit është i treti rast në botë, është El Polo i Venezuelës që punoi me kartelet, është shefi i shërbimit të Guinesë Bisau, të cilën kartelet amerikano-latine e shndërruan në narkoshtetin e parë dhe të vetëm në Afrikë, dhe tani vjen Vlora Hyseni, ky personazh i përçudnuar, që pasi shkarkohet nga detyra në një vend demokratik, për motive të forta, po ato motive e sjellin atë këshilltare të Padrinos dhe më pas e sjellin në krye të SHISH. Emërimi i saj, jashtë të gjitha kritereve, përbën aktin më të papërgjegjshëm ndaj sigurisë së vendit. Emërimi i saj ishte në mënyrë absolute për një rol të dyfishtë. E kam deklaruar në atë kohë, e deklaroj edhe sot, ajo ishte një shërbëtore e Vuçiçit dhe Edi Ramës”, u shpreh Berisha.
Më tej, kreu i PD-së ngriti akuza për nxjerrje të sekreteve shtetërore dhe bashkëpunim me persona të botës së krimit.
“Por kjo është njëra anë, ana më e zezë është se njeriu që kishte për detyrë sigurinë e vendit dhe qytetarëve të këtij vendi, bashkëpunonte me hanxharët e krimit, ishte një ushtare e hanxharëve të krimit. Ishte ushtare e një organizate më të rrezikshme kriminale. Ishte njeriu që lëshonte në duart e bandave çdo sekret të këtij shteti. Ishte njeriu që me porosi të Ergys Agasit shkarkonte secilin prej jush”, deklaroi ai.
Berisha iu drejtua më pas drejtpërdrejt disa deputetëve të mazhorancës, duke pretenduar se ata kishin pasur përballje me këtë mekanizëm.
“Damian, e ke vetë parasysh ti. Nuk je i vetmi ti, janë shumë si ti. Se e shihja se po bëje sikur nuk po dëgjoje. Ulsi, shko merr dosjen sa herë të del emri aty. Por prapë, në këtë rast, tragjike është se është shembur piramida e sigurisë”, përfundoi Berisha.
