Partizani vijon përgatitjet për ndeshjen e së shtunës ndaj Egnatias në Rrogozhinë, e programuar për t’u luajtur në orën 13:30. Të kuqtë zhvilluan dje paradite stërvitjen e radhës, ku të pranishëm ishin të gjithë futbollistët, përfshirë edhe ata me probleme.
Pesë lojtarë pritet të mos jenë në dispozicion as në sfidën ndaj Egnatias. Andi Hadroj është jashtë prej më shumë se dy muajsh për shkak të dëmtimit në muskujt e barkut. Lideri i mbrojtjes pritet që pas ndeshjeve të ekipeve kombëtare të jetë gati.
Eljon Sota, që pësoi një tërheqje muskulore në derbi, gjithashtu mbetet jashtë për Egnatian dhe pritet të kthehet në stërvitje me ritëm të plotë pas sfidës me rrogozhinasit. E njëjta gjë vlen edhe për Koçijanin, i cili vuan një problem në pjesën poshtë gjurit dhe vijon terapinë. Viktor da Silva dhe Kristian Mba vijojnë gjithashtu të jenë jashtë për shkak dëmtimesh. Senegalezi ka shanse minimale për të qenë në stol ndaj rrogozhinasve.
FORMACIONI – Lajme të mira ka nga Alban Hoxha, i cili tashmë thuajse e ka kaluar plotësisht problemin në shpatull dhe është tërësisht i gatshëm, duke qenë më i avantazhuar se Qirko. Sakaq, pjesa tjetër e formacionit pritet të jetë e njëjta, duke pasur parasysh faktin që ndaj Vllaznisë e gjithë skuadra ishte në superformë.
Duhet thënë se pavarësisht mungesave, Partizani e ka krijuar një formacion “tip” dhe Abilaliaj ka bërë vetëm ndërhyrje të detyruara.
