Përveç ekipit të parë, edhe Partizani U-21 po bën mirë në Kategorinë Superiore dhe dje arriti një fitore ndaj Kukësit U-21, pas një ndeshje, që pati plot 10 gola. Sfida e luajtur në stadiumin “Arena e Demave” përfundoi me shifrat 4-6 për skuadrën e kuqe, teksa disa emra të ekipit të parë u bënë protagonistë në këtë përballje.
Kukësi shënoi i pari me Peposhin në të 9-ën, por pas vetëm një minute nisi festivali i golave. Fillimisht barazoi Ibraimi në të 10-ën, teksa më pas Luiz Birçaj realizoi dy herë në minutat 15 dhe 22. Në të 39-ën shënoi Gjergji Kote, një tjetër talent i grumbulluar herë pas here në ekipin e parë. Tre minuta më pas Birçaj plotësoi tripletën dhe çoi shifrat në 1-5.
Në të 43-ën Sula ngushtoi për Kukësin me penallti. Në të dytën Markoçi tundi rrjetën për 6-1. Pas kësaj skuadra e Gerd Haxhiut e lëshoi disi ndeshjen dhe Kukësi shënoi edhe dy herë me Xhambazin dhe Hilajn, duke i çuar shifrat në 4-6. Partizani ndodhet në krye të renditjes me 16 pikë pas 7 ndeshjesh, aq sa Bylisi me një ndeshje më pak.
