Avokati Altin Goxhaj ka reaguar pas vendimit të Prokurorisë së Tiranës për mosfillimin e procedimit penal ndaj tij, pas kallëzimit të Antiterrorit lidhur me deklaratat e tij publike kundër kryeministrit Edi Rama.
Goxhaj e cilëson vendimin si një zhvillim me rëndësi për kufirin mes gjuhës politike dhe përgjegjësisë penale, duke argumentuar se protestat dhe kritikat ndaj pushtetit nuk duhet të kriminalizohen automatikisht.
Në deklaratën e tij, avokati i referohet shprehjeve “Rama përfundon si Gadafi” dhe “në 2 korrik e tërheqim zvarrë si Gadafin”, të cilat, sipas tij, u përdorën si formulime ekstreme politike për të provokuar një reagim institucional dhe për të sfiduar frikën e qytetarëve.
Sipas Goxhajt, Prokuroria ka vlerësuar se, megjithëse shprehja “e tërheqim zvarrë si Gadafin” ka natyrë të dhunshme në kuptimin literal, nga materiali i shqyrtuar nuk rezultojnë plan konkret dhune, armatosje, objektiva për t’u sulmuar apo veprime konkrete kundër rendit kushtetues.
Avokati citon gjithashtu një pjesë të vendimit, ku thuhet:
“E drejta penale nuk mund të zëvendësojë debatin politik dhe nuk mund të përdoret si instrument për të përcaktuar se cilat opinione politike janë të pranueshme.”
Goxhaj e konsideron mosfillimin e procedimit penal si një përgjigje institucionale ndaj frikës së qytetarëve për të kritikuar pushtetin dhe për të marrë pjesë në protesta.
“Mos kini frikë të kritikoni pushtetin. Mos kini frikë të protestoni. Mos kini frikë nga gjuha e fortë politike”, shprehet ai.
Në përfundim të deklaratës, avokati thekson se kryeministri, Policia dhe Antiterrori nuk mund të zëvendësojnë ligjin dhe se kundërshtari politik nuk mund të konsiderohet automatikisht autor i një vepre penale.
“RAMA DHE ANTITERRORI NUK JANË MBI LIGJIN. PROTESTA NUK ËSHTË KRIM. FJALA POLITIKE NUK ËSHTË KRIM. FRIKA PO VDES!”, përfundon Goxhaj deklaratën e tij.
