Miliarda lekë nga buxheti i shtetit janë përqendruar te një grup i vogël kompanish që kanë marrë kontrata dhe pagesa publike në vite. Të dhënat e analizuara tregojnë se 20 përfituesit kryesorë kanë marrë së bashku 247.28 miliardë lekë, rreth 2.7 miliardë euro, përmes më shumë se 17 mijë pagesave. Në listë janë kompani të njohura të ndërtimit, energjisë, hidrokarbureve dhe shërbimeve, ndërsa për disa prej tyre një pjesë e kontratave rezultojnë të shënuara me “flamur të kuq” në të dhënat e prokurimeve. Shifrat ngrenë pikëpyetje mbi përqendrimin e fondeve publike dhe kërkojnë verifikim të mëtejshëm mbi mënyrën se si janë dhënë dhe zbatuar këto kontrata.
Morën 2.7 miliardë euro! Shumica me dosje në SPAK, ja kush janë 20 kompanitë kryesore që volën Thesarin
Shifrat japin një panoramë të qartë të përqendrimit të fondeve publike te një numër relativisht i kufizuar kompanish. Në total, 20 përfituesit kanë marrë pagesa me vlerë 247,283,911,067 lekë, sipas të dhënave të përfshira në analizë.
Në krye të listës qëndron SALILLARI, kompania e Pëllumb Salillarit, me 1,012 pagesa dhe një vlerë totale prej 29.12 miliardë lekësh.
Pas saj renditet G.P.G. COMPANY, në pronësi të Paqsor Buzit dhe Gëzim Danit, me 26.28 miliardë lekë të regjistruara në pagesa.
Vendin e tretë e mban FUSHA, me një vlerë totale prej 25.63 miliardë lekësh.
Një tjetër emër që spikat në listë është Trans Adriatic Pipeline AG Albania. Kompania rezulton me vetëm 75 pagesa, por vlera e tyre arrin në 24.73 miliardë lekë. Kjo tregon se numri i pagesave nuk përkthehet domosdoshmërisht në vlerë më të madhe totale.
Në anën tjetër është GECI, e cila rezulton me 2,116 pagesa, ndërsa vlera e përgjithshme e regjistruar është 13.24 miliardë lekë.
Kompanitë me numrin më të lartë të kontratave
Përveç pagesave, të dhënat e prokurimeve publike japin informacion edhe për kontratat e fituara nga disa prej kompanive kryesore.
SALILLARI rezulton me 48 kontrata të fituara, nga të cilat 19 janë shënuar me “flamur të kuq”.
G.P.G. COMPANY SHPK, në pronësi të Paqsor Buzit dhe Gëzim Danit, figuron me 50 kontrata, ku 16 prej tyre janë shënuar me flamur të kuq.
FUSHA SHPK ka regjistruar 83 kontrata të fituara, ndërsa 43 prej tyre mbajnë shënimin “flamur i kuq”.
Një tjetër kompani në këtë listë është 4 A-M SHPK, me 63 kontrata të fituara, prej të cilave 27 janë shënuar me flamur të kuq.
Ndërsa A.N.K. rezulton me 14 kontrata të fituara, ku 7 prej tyre janë shënuar me këtë tregues./Infonews
| Nr. | Përfituesi | Pagesa | Vlera |
|---|---|---|---|
| 1 | SALILLARI | 1,012 | 29,122,526,672 lekë |
| 2 | G.P.G. COMPANY | 1,146 | 26,283,452,745 lekë |
| 3 | FUSHA | 1,331 | 25,632,642,758 lekë |
| 4 | Trans Adriatic Pipeline AG Albania | 75 | 24,730,211,388 lekë |
| 5 | 4 A-M | 842 | 23,055,964,479 lekë |
| 6 | GJOKA KONSTRUKSION | 520 | 22,097,707,752 lekë |
| 7 | A.N.K. | 345 | 20,641,121,235 lekë |
| 8 | INTEKAR – ASL | 41 | 19,421,639,635 lekë |
| 9 | BANKERS PETROLEUM ALBANIA LTD | 90 | 18,108,046,935 lekë |
| 10 | CURRI – Sh.p.k | 882 | 14,166,921,656 lekë |
| 11 | GECI | 2,116 | 13,237,828,617 lekë |
| 12 | ALB-STAR | 392 | 11,983,129,087 lekë |
| 13 | BE-IS SH.P.K | 793 | 11,894,257,047 lekë |
| 14 | Integrated Energy BV SPV | 458 | 11,153,510,827 lekë |
| 15 | ALBA KONSTRUKSION | 461 | 9,476,758,871 lekë |
| 16 | PE-VLA-KU | 302 | 9,407,974,934 lekë |
| 17 | MILITARY SYSTEM SUPPLY COMPANY | 136 | 9,008,394,237 lekë |
| 18 | KURUM INTERNATIONAL SH.A. | 42 | 6,321,747,985 lekë |
| 19 | SHPRESA – AL | 1,964 | 5,757,797,451 lekë |
| 20 | EVEREST | 279 | 5,021,542,070 lekë |
