Dy persona kanë përfunduar në prangat e Policisë në kuadër të hetimeve për plagosjen e Juxhin Hamajezit, ngjarje e ndodhur në fund të muajit maj.
Në pranga kanë rënë Gjergji Lleshi dhe Lulzim Mejdani, të cilët dyshohet se kanë qenë në dijeni të krimit dhe kanë bashkëpunuar me autorin e dyshuar, Klodian Kallon.
Sipas burimeve hetimore, të dy janë arrestuar për veprën penale të “moskallëzimit të krimit”. Gjatë marrjes në pyetje, ata kanë zgjedhur të mos japin asnjë sqarim për rrethanat e ngjarjes apo për personin e dyshuar si autor, duke deklaruar se do të dëshmojnë vetëm para gjykatës.
Ngjarja ndodhi më 27 maj, kur Juxhin Hamajezi u qëllua me armë zjarri në këmbë. Hetimet paraprake tregojnë se plagosja erdhi pas një konflikti me Klodian Kallon, i cili dyshohet të ketë pasur si shkak një borxh të pashlyer.
Sipas hetuesve, mosmarrëveshja lidhej me një automjet tip “Jaguar”, të cilin Hamajezi dyshohet se e kishte marrë pa shlyer pagesën e rënë dakord. Konflikti mes palëve më pas ka degraduar, duke përfunduar me përdorimin e armës së zjarrit.
Burime nga grupi hetimor bëjnë me dije se si Juxhin Hamajezi, ashtu edhe Klodian Kallo rezultojnë persona me precedentë të mëparshëm penalë.
Ndërkohë, hetimet vijojnë për të dokumentuar plotësisht dinamikën e ngjarjes dhe për të përcaktuar rolin e secilit prej personave të përfshirë.
